facebook
Wednesday , December 7 2016
Home / Featured / पालकमंत्र्यांचा आयुक्तांना फ्री हँड
aurangabad

पालकमंत्र्यांचा आयुक्तांना फ्री हँड

आवाज न्यूज लाईन

औरंगाबाद : ‘कुणाला सस्पेंड करायचे ते करा, तुम्हाला फ्री हँड दिला आहे. सस्पेंड करून जे शिल्लक राहतील त्यांना सोबत घेऊन आपण काम करू.’ असे म्हणत पालकमंत्री रामदास कदम यांनी खासदार-आमदारांसमक्ष पालिकेचे आयुक्त ओम प्रकाश बकोरिया यांची पाठराखण केली. ‘आयुक्तांच्या कामात कोणीही हस्तक्षेप करू नका, भ्रष्ट अधिकाऱ्यांना पाठीशी घालू नका,’ अशी समजही त्यांनी या लोकप्रतिनिधींना दिली.
विविध विकास कामे आणि मंत्रिमंडळ बैठकीच्या पूर्वतयारीचा आढावा घेण्यासाठी रामदास कदम बुधवारी शहरात आले होते. महापौर बंगल्यात त्यांनी आढावा बैठका घेतल्या. एमजीएम परिसरात १६ एकर क्षेत्रावर शिवसेनाप्रमुख बाळासाहेब ठाकरे स्मृतिवन उभारले जाणार आहे. त्याचे पॉवर पॉइंट प्रेझेंटेशन कदम यांना दाखवण्यात आले. यावेळी खासदार चंद्रकांत खैरे, महापौर त्र्यंबक तुपे, आमदार संजय शिरसाट, शिवसेनेचे जिल्हाप्रमुख अंबादास दानवे, महानगरप्रमुख प्रदीप जैस्वाल, पालिकेतील सभागृहनेते राजेंद्र जंजाळ, आयुक्त बकोरिया, कार्यकारी अभियंता सिकंदर अली आदी उपस्थित होते.
प्रेझेंटेशनमध्ये काही सुधारणा करण्याची सूचना पालकमंत्र्यांनी अधिकाऱ्यांना केली. ‘स्मृत‌िवन परिसरातील शंभर झाडे काढा व हर्सूल तलावाच्या परिसरात विकसित केलेल्या जांभुळबनाच्या भोवती पुन्हा लावा,’ असे त्यांनी पालिकेच्या अधिकाऱ्यांना सांगितले. ‘किती दिवसांत हे काम करणार,’ असा सवाल त्यांनी आयुक्तांना केला. आयुक्त म्हणाले, ‘१५ ऑक्टोबरपर्यंत हे काम पूर्ण करू.’ त्यावर कदम म्हणाले, ‘१५ ऑक्टोबर खूप लांब होते. त्याच्या अगोदर हे काम करा.’ त्यावेळी आयुक्तांनी १० ऑक्टोबरपर्यंत काम करण्याचा शब्द दिला. सगळी यंत्रणा कामाला लावा आणि हे काम युद्धपातळीवर करा, असे कदम यांनी आयुक्तांना सांगितले.
कदम यांचे हे वाक्य संपताच आमदार शिरसाट आयुक्तांना उद्देशून म्हणाले, ‘किमान १० ऑक्टोबरपर्यंत तरी कुणाला सस्पेंड करू नका.’ शिरसाटांचे हे विधान खोडून काढत कदम आयुक्तांना म्हणाले, ‘तुम्हाला फ्री हँड दिला आहे. कुणाला सस्पेंड करायचे ते करा. कुणाचीही गय करू नका. सस्पेंड करून जे शिल्लक राहतील त्यांना सोबत घेऊन काम करू.’ शिरसाटांना उद्देशून ते म्हणाले, ‘आयुक्तांच्या कामात हस्तक्षेप करू नका. भ्रष्ट अधिकाऱ्यांना पाठीशी घालू नका.’

तिघांचे काम उत्तम
महापालिकेत सध्या महापौर तुपे, सभागृहनेते जंजाळ व आयुक्त बकोरिया यांचेच काम उत्तम सुरू आहे, असे प्रशस्तीपत्र पालकमंत्री यांनी दिले. जांभुळबनात साडेपाच हजार झाडे लावल्याबद्दल त्यांनी उद्यान अधीक्षक विजय पाटील यांचे विशेष अभिनंदन केले.

Check Also

udyojak1

उद्योजक व्हा… : २५ रुपये हजेरी ते कोटींची उलाढाल

सरोवर कुटुंबीय हे मूळचे औरंगाबाद जिल्ह्यातील गंगापूर तालुक्यातील डोणगाव या गावचे. गणेश यांचे वडील मुरलीधर …

Leave a Reply

Your email address will not be published. Required fields are marked *