facebook
Saturday , February 25 2017
Breaking News
Home / Featured / दिव्यांगांच्या डब्यातून प्रवास करणारे ५० पोलीस ताब्यात

दिव्यांगांच्या डब्यातून प्रवास करणारे ५० पोलीस ताब्यात

कायदा आणि सुव्यवस्था राखण्याचे ज्यांचे काम असते अशा ५० पोलिसांना रेल्वे सुरक्षा बलाने (आरपीएफ) एका विशेष मोहिमेअंतर्गत रेल्वेच्या दिव्यांगांच्या डब्यातून प्रवास केल्याप्रकरणी ताब्यात घेतले आहे. आरपीएफच्या महानिरीक्षकांनी पोलिसांना दिव्यांगांसाठी राखीव असलेल्या डब्यांमधून प्रवास करू नका अशी वारंवार ताकीद दिली होती. मात्र पोलिसांनी मनावर न घेतल्यामुळे अखेर ही कारवाई करण्यात आली.

आरपीएफने कल्याण, अंबरनाथ, बदलापूर, डोंबिवली, ठाणे आणि कुर्ला अशा महत्त्वाच्या स्थानकांमध्ये ही विशेष मोहीम राबवली.

 या मोहिमेअंतर्गत रेल्वे सुरक्षा बलाच्या एका तुकडीने गा़डीतील दिव्यांग डब्यात प्रवेश करून पोलीस प्रवास करत आहेत का, याची तपासणी केली. या विशेष डब्यातून पोलीस प्रवास करत असल्याचे आढळल्यानंतर या तुकडीने त्यांचा ओळख क्रमांक नोंदवून त्यांना ताब्यात घेतले. विशेष मोहिमेअंतर्गत ताब्यात घेण्यात आलेल्या पोलिसांच्या या आक्षेपार्ह प्रवासाबाबत त्यांच्या वरिष्ठांकडे तक्रार करण्यात येणार आहे.

पोलिसांच्या दिव्यांगांसाठी राखीव असलेल्या डब्यातून प्रवास करण्याबाबत बोलताना एक रेल्वेचा अधिकारी म्हणाला, अशा राखीव डब्यातून दिव्यांग नसलेल्या प्रवाशांनी प्रवास करणे हे आक्षेपार्हच आहे. शिवाय हेच प्रवासी साखळी ओढण्याचेही काम करतात. गाड्या वेळेवर न येण्यामागच्या मुख्य कारणांपैकी हे एक कारण आहे, अशी माहितीही या अधिकाऱ्याने दिली.
दिव्यांगांच्या डब्यातून प्रवास करणाऱ्या प्रवाशांनी साखळी ओढल्यामुळे गाडीला २ ते ५ मिनिटे उशीर होत असतो असेही तो अधिकारी म्हणाला.

आरपीएफची ही कारवाई म्हणजे अशा प्रवाशांच्या डोळ्यात अंजन घालणारी कारवाई आहे, अशी प्रतिक्रिया घाटकोपर ते सीएसटी असा प्रवास करणाऱ्या नितीन गायकवाड या दिव्यांग प्रवाशाने व्यक्त केली आहे. गायकवाड पुढे म्हणाले, की अनेकदा तक्रारी करूनही आरपीएफने दिव्यांग डब्यातून प्रवास करणाऱ्या पोलिसांना दंड ठोठावलेला नाही. त्यांना केवळ ताब्यात घेतले जाते. दिव्यांगांचा संपूर्ण डबा अशा प्रवाशांनी भरला जाणे हे दिव्यांग प्रवाशांसाठी खरेच तापदायक गोष्ट आहे, अशी प्रतिक्रियाही गायकवाड यांनी व्यक्त केली.

आरपीएफचे वरिष्ठ विभागीय आयुक्त सचिन भालोडे याबाबत म्हणाले, की ही कारवाई म्हणजे दिव्यांगांची समस्या सोडवण्यासाठी आम्ही हाती घेतलेल्या मोहिमेचाच एक भाग आहे. हे प्रकरण गांभिर्याने घेतले जावे यासाठी आम्ही दिव्यांगांच्या डब्यातून प्रवास करणाऱ्या या पोलिसांच्या वरिष्ठांना, तसेच विभाग प्रमुखांनाही लेखी कळवणार आहोत, असेही भालोडे म्हणाले.

Check Also

अशोक खरात – प्रभाग क्र. ११ ‘क’ गट राष्ट्रीय समाज पक्षाचे अधिकृत उमेदवार

Click on Below Video Related

Leave a Reply

Your email address will not be published. Required fields are marked *