facebook
Saturday , February 25 2017
Breaking News
Home / Featured / पिंपरी- पुणे बीआरटी मार्गाने जोडले जाणार

पिंपरी- पुणे बीआरटी मार्गाने जोडले जाणार

आवाज न्यूज नेटवर्क

पुणे : संगमवाडी -विश्रांतवाडी आणि नगर रोडवर जलद बस वाहतूक सेवा (बीआरटी) यशस्वीपणे कार्यान्वित केल्यानंतर आता पिंपरी – चिंचवडमधील दोन बीआरटी मार्ग शहराला जोडण्यासाठी पुणे महापालिकेने तयारी सुरू केली आहे. सांगवीपर्यंत येणारा बीआरटी मार्ग औंध – गणेशखिंड रस्त्यामार्गे, तर जुन्या पुणे – मुंबई महामार्गाने बोपोडीपर्यंत येणारा बीआरटी मार्ग वाकडेवाडी, इंजिनीअरिंग कॉलेज चौकामार्गे महापालिका भवनापर्यंत जोडला जाणार आहे. येत्या काही दिवसांत त्यासाठीची टेंडर प्रक्रिया पूर्ण केली जाणार असून, निवडणुकीपूर्वी या रस्त्यांचे काम सुरू केले जाण्याची शक्यता आहे.
महापालिकेने गेल्या वर्षी आळंदी रोड, तर २०१६ मध्ये नगर रोडवरील बीआरटी सुरू केली. बीआरटीसाठी आवश्यक असणाऱ्या अत्याधुनिक बसथांबे, आयटीएमएस प्रणाली अशा सर्व सुविधा कार्यान्वित करण्यात आल्या. नगर रोडवरील बीआरटी सुरू झाल्यानंतर शहरातील बीआरटीचे इतर मार्ग सुरू करण्याच्या दृष्टीने आता महापालिकेने पुढाकार घेतला आहे. पिंपरी-चिंचवड महापालिकेने किवळे ते सांगवी अशी सेवा सुरू केली असून, त्याला उत्तम प्रतिसाद लाभत आहे. हीच सेवा आता पुणे महापालिकेपर्यंत विस्तारण्याचा प्रयत्न केला जाणार आहे. सांगवीपासून औंध – गणेशखिंड रोडमार्गे पुणे महापालिकेपर्यंतचे अंतर सुमारे साडेसहा किमी असून, काही ठराविक भाग सोडला तर या भागातील रस्तेही पुरेसे रुंद आहेत. आळंदी आणि नगररोडप्रमाणेच बीआरटीचा मार्ग या रस्त्यावरही मधोमधच असणार आहे.
पिंपरी-चिंचवड महापालिकेतर्फे जुन्या पुणे-मुंबई महामार्गावर निगडी ते दापोडी हा बीआरटीचा टप्पा सुरू करण्यासाठी हालचाली सुरू आहेत. हा बीआरटी मार्ग जोडण्यासाठी पुणे महापालिकेनेही तयारी सुरू केली असून, बोपोडी (हॅरिस ब्रिज) ते पुणे महापालिका या सुमारे साडेपाच किमीच्या अंतरावर बीआरटी मार्ग विकसित केला जाणार आहे. या रस्त्यावरही अगदी तुरळक ठिकाणी स्वतंत्र मार्ग कार्यान्वित करण्यात अडचणी उद्भवणार असून,  उर्वरित रस्ता पुरेसा रुंद असल्याचा दावा महापालिकेने केला आहे.
महापालिका आयुक्तांनी २०१६-१७ च्या अर्थसंकल्पात नवे ३० किमीचे बीआरटी मार्ग विकसित करण्यासाठी निधीची तरतूद केली होती. त्यातूनच, या दोन्ही रस्त्यांवरील कामे केली जाणार असल्याचे सांगण्यात येत आहे. या दोन्ही रस्त्यांवरील बीआरटीसाठीची टेंडर प्रक्रिया लवकरच सुरू केली जाणार असल्याचे संकेत देण्यात आले. ही सर्व प्रक्रिया पूर्ण होऊन निवडणुकीपूर्वी प्रत्यक्षात हे काम सुरू करण्याचे महापालिकेचे नियोजन आहे.

Check Also

अशोक खरात – प्रभाग क्र. ११ ‘क’ गट राष्ट्रीय समाज पक्षाचे अधिकृत उमेदवार

Click on Below Video Related

Leave a Reply

Your email address will not be published. Required fields are marked *