facebook
Sunday , April 30 2017
Breaking News
Home / Maharashtra / घोटण, हातगाव गावात दारूबंदीसाठी मतदान प्रक्रिया राबविण्यात प्रशासन दुर्लक्ष

घोटण, हातगाव गावात दारूबंदीसाठी मतदान प्रक्रिया राबविण्यात प्रशासन दुर्लक्ष

आवाज न्यूज नेटवर्क –

शेवगाव : तालुक्यातील घोटण व हातगाव येथील गावात दारूबंदीसाठी मतदान प्रक्रिया राबविण्यात प्रशासन दुर्लक्ष करीत असल्याच्या तक्रारी महिलांनी ज्येष्ठ समाजसेवक अण्णा हजारे यांच्याकडे राळेगण सिद्धी येथे मंगळवारी (१८ ऑक्टोबर) त्यांची भेट घेऊन केल्या. घोटण येथील ग्रामसभेत समाजकंटकांनी केलेली अरेरावी व प्रशासनाचे दुर्लक्ष यावर चिंता व्यक्त करत, या दोन्ही गावांतील तक्रारींसंदर्भात राज्याचे मुख्यमंत्री देवेंद्र फडणवीस यांना पत्र पाठविणार असल्याचे अण्णा हजारे यांनी सांगितले.
दारूबंदी समितीचे जिल्हा कार्याध्यक्ष अमोल घोलप, शेवगाव तालुकाध्यक्ष दत्तात्रय फुंदे, बाळासाहेब सुसे यांच्या नेतृत्वाखाली संजय टाकळकर, गीता थोरवे, मंदा मोटकर, मीरा मोटकर, सुनीता मोटकर, सुनीता भोसले, अशोक भोसले, संदीप मोटकर, नामदेव घुगे, सोपान मोटकर, महादेव मोटकर, पत्रकार सुभाष बुधवंत आदींच्या शिष्टमंडळाने अण्णांची भेट घेऊन तक्रारींचे लेखी निवेदन देऊन चर्चा केली.

घोटणच्या दारूबंदी ग्रामसभेच्या ८ दिवस आधी निवेदन देऊनही प्रशासनाचे अधिकारी, पोलिस तसेच दारूबंदी उत्पादक शुल्क खात्याचे अधिकारी उपस्थित राहिले नाहीत. ग्रामसभेत काही समाजकंटकांनी मिरचीची पूड डोळ्यात टाकणे, वाद घालणे व शिवीगाळ करण्याचा प्रकार झाला. त्यास प्रशासन व पोलिस जबाबदार तसेच दारूबंदी खात्याचे अधिकारीच दारूबंदीसाठी उदासीन असल्याचा गंभीर आरोप या महिलांनी केला. हातगाव येथेही ग्रामसभेच्या सर्व प्रक्रिया पार पडूनदेखील दारूबंदीसाठी मतदान प्रक्रिया राबविण्यात प्रशासनाचे दुर्लक्ष करीत असल्याच्या गंभीर तक्रारी महिलांनी केल्या.

दारूबंदी खात्याचे अधिकारी दारूबंदी समितीच्या कार्यकर्त्यांना भेटण्यासाठी वेळ देत नाहीत, तसेच उडवाउडवीची उत्तरे देतात, असे अमोल घोलप म्हणाले. घोटण व हातगाव या दोन्ही गावात दारूबंदीसाठी महिलांनी पुढाकार घेतला ही अतिशय चांगली बाब आहे. या दोन्ही गावांत नियमानुसार दारूबंदीसाठी मतदानाची प्रक्रिया राबविण्यासाठी आपण मुख्यमंत्री फडणवीस यांच्याशी पत्रव्यवहार करू. ग्रामसभा ही ग्रामविकासाच्या दृष्टीने अतिशय महत्त्वाची असून ग्रामसभेत समाजकंटक अडथळा आणत असेल, तर ही चिंतेची बाब आहे, या बाबत मुख्यमंत्र्यांशी आपण बोलणार असल्याचेही अण्णांनी या वेळी सांगितले.

Check Also

शहरात दिवसाही हुडहुडी

जानेवारीच्या पहिल्या आठवड्यापासून सुरू असलेली थंडीची लाट अद्याप कायम असून आता दिवसाचे तापमानही घटले आहे. …

Leave a Reply

Your email address will not be published. Required fields are marked *