facebook
Saturday , April 29 2017
Breaking News
Home / Featured / ‘महाराष्ट्रातही कानडी राहतात याचा विचार करा’

‘महाराष्ट्रातही कानडी राहतात याचा विचार करा’

आवाज न्यूज नेटवर्क –

मुंबई –  बेळगावात मराठी सीमाबांधवावर सध्या जी ठोकशाही आणि जुलूमशाही सुरू आहे ती लोकशाहीच्या कोणत्या व्याख्येत बसते? मुंबईसह महाराष्ट्रात लाखो कानडी बांधव राहत असून उद्योग, व्यवसाय करतात, त्यांची काळजी आम्हीच घेत आहोत परंतु बेळगावातील घटनांमुळे त्यांची झोप उडाली आहे, याचा विचार करा, असा गर्भित इशारा शिवसेनेने कर्नाटकाचे मुख्यमंत्री सिद्धरामय्या यांना दिला आहे.

शिवसेनेने मुखपत्र ‘सामना’ मधून बेळगावमधील मराठी सीमाबांधवाच्या व्यथा मांडल्या आहेत. कर्नाटक राज्याचा स्थापना दिवस तेथील मराठी संघटनांनी काळा दिवस पाळला याचे सालाबादप्रमाणे निमित्त करून कानडी पोलिसांनी जो अमानुष हैदोस घातला त्याचा फक्त धिक्कार करून चालणार नाही. या असल्या पोलिसी पशूंवर मानवी हक्काच्या उल्लंघनांचे खटलेच दाखल करायला हवेत व याकामी महाराष्ट्राच्या मराठी सरकारने पुढाकार घेतला पाहिजे, अशी मागणीही शिवसेनेने केली आहे.

काळे फेकण्याची व हल्ले करण्याची क्षमता महाराष्ट्राच्याही मनगटात आहे आणि कोल्हापूरच्या शिवसैनिकांनी ते करून दाखवलेच आहे. मराठी सीमा बांधवांवर अत्याचार करणार्‍या कानडी मंडळींनी हे लक्षात घ्यावे. कावेरी पाणी प्रश्‍नावरून रण पेटले तेव्हा तामीळनाडूतील कानडी वस्त्यांवर भयंकर हल्ले झाले होते. म्हणजे मनगटे व अस्मिता सगळ्यांनाच आहेत, असा इशारा शिवसेनेने दिला आहे. महाराष्ट्राच्या मुख्यमंत्र्यांनीही कुणाच्या रागलोभाची पर्वा न करता मराठी सीमा बांधवांच्या पाठीशी ठामपणे उभे राहावे, असेही शिवसेनेने म्हटले आहे.

कर्नाटकच्या घशात कोंबलेल्या २० लाख सीमा बांधवांचा लढा काही कालचा आणि आजचा नाही. ६० वर्षांपासून तो सुरूच आहे. सहा दशके कानडी पोलीस व तेथील राजकीय गुंड मराठी जनांवर अत्याचार करीत आहेत. तरीही मराठी बांधवांचा लढा संपला नसेल तर मायबाप सरकारने त्यांचा आक्रोश समजून घेतला पाहिजे व न्याय द्यायला हवा, असे सेनेने म्हटले आहे. मुंबईसह महाराष्ट्रात लाखो कानडी बांधव गुण्यागोविंदाने नांदत आहेत व आपला उद्योग, व्यवसाय करीत आहेत. त्यांची काळजी आम्ही घेतच आहोत. मात्र बेळगावातील घटनांमुळे त्यांची झोप उडाली आहे याचा विचार कर्नाटकाच्या मुख्यमंत्र्यांनी करावा असा इशारा कर्नाटकचे मुख्यमंत्री सिद्धरामय्या यांना शिवसेनेने ‘सामना’मधून दिला आहे.

Check Also

1)देहूरोडमध्ये बॉम्ब सदृष्य वस्तूचा स्फोट; तीन जखमी 2) स्वाईन फ्लूमुळे पुणे व्हेंटीलेटरवर

Related

Leave a Reply

Your email address will not be published. Required fields are marked *