facebook
Monday , December 5 2016
Home / Featured / जळगावमध्ये श्रीराम रथोत्सव आज
shree-ram

जळगावमध्ये श्रीराम रथोत्सव आज

आवाज न्यूज नेटवर्क –

जळगाव – जळगावचे ग्रामदैवत श्रीराम मंदिर संस्थानच्या विद्यमाने कार्तिक प्रबोधिनी एकादशीनिमित्त आज (दि.११) श्रीराम रथोत्सवाचे आयोजन करण्यात आले आहे. सकाळी ११ वाजता रथोत्सवाला प्रारंभ होईल. यावेळी जळगावनगरी श्रीरामांच्या जयजयकाराने दुमदुमणार आहे.

‘दरसाल दहा दिसा येतो उत्सवाले भार… वहनावरे बशीसन येती दहा अवतार… दाही सरता वहन आली एकादशी मोठी.. मंग सावरला रथ झाली गावांमधी दाटी.. ’, अशा ओवीतून कवियत्री बहिणाबाई चौधरी यांनी सुवर्णनगरीतील रथोत्सवाचे वर्णन केले आहे. शुक्रवारी पहाटे काकडाआरती व प्रभु श्रीरामांच्या उत्सव मूर्तीस महाअभिषेक, ७ वाजता महाआरती, साडेसात वाजता सांप्रदायिक पंचपदी भजन, सकाळी १०.३० वाजता श्रीराम रथाचे महापूजन ‌गादीपती हभप मंगेश महाराज जोशी यांच्याहस्ते वेदमंत्र घोषात मंदिराच्या प्रांगणात होईल. कीर्तनकार हभप योगेश्वर महाराज उपासनी (अमळनेर), सनातनचे नंदकुमार जाधव, भाजपचे राष्ट्रीय प्रवक्ता माधव भांडारी (मुंबई), जलसंपदामंत्री गिरीश महाजन, राज्यमंत्री गुलाबराव पाटील, खासदार ए. टी. पाटील, आमदार सुरेश भो‍ळे, जिल्हाधिकारी रुबल अग्रवाल, जिल्हा पोलिस अधीक्षक जालिंदर सुपेकर, महापौर नितीन लढ्ढा, उपमहापौर ललित कोल्हे, मनपाचे आयुक्त जीवन सोनवणे, माजी गृहनिर्माणमंत्री सुरेश जैन, माजी महसूलमंत्री एकनाथ खडसे, जैन उद्योग समूहाचे अशोक जैन, मनपातील विरोधी पक्षनेते वामनराव खडके, श्रीकांत खटोड हे प्रमुख अतिथी म्हणून उपस्‍थीत राहणार आहेत. श्रीराम मंदिर संस्‍थानचे विश्वस्त, रथोत्सव समितीचे अध्यक्ष भालचंद्र पाटील, कार्याध्यक्ष प्रभाकर पाटील, दत्तात्रय चौधरी, सदस्य भानुदास चौधरी, विलास चौधरी, दादा नेवे, शिवाजी भोईटे, शैलेश पाटील, सुजित पाटील, दिलीप कुळकर्णी, रथोत्सवाचे मानकरी व सेवेकरी यांच्या उपस्थितीत रथाला प्रारंभ होईल.

रथोत्सव ११ वाजेपासून

महाआरतीनंतर उत्सव मूर्ती रथावर स्थानापन्न केल्या जातील. रथावर गरूड, मारुती, अर्जुन व दोन लाकडी घोडे यांच्या मूर्ती असतील. झेंडूच्या माळांनी हा रथ सुशोभित केलेला असेल. रथाच्या अग्रभागी सनई, नगारा, ध्वजधारी पथक, बँड पथक, वावडद्याचे वारकरी सांप्रदायिक भजनी मंडळ, पाथरीतील श्री गुरुदत्त भजनी मंडळ, भजनी मंडळे, श्री संत मुक्ताबाईंच्या पादुका असलेली पालखी व त्यामागे श्रीरामांचा रथ राहील. सकाळी ११ वाजता श्रीराम मंदिरपासून रथाला प्रारंभ होईल.

श्रीराम मंदिरापासून कोल्हेवाडा, आंबेडकरनगर, चौधरी वाडा, तेली चौक, मंदिराच्या मागील गल्लीतून रथ चौक, बोहरा गल्ली, सुभाष चौक, दाणा बाजार, पिपल बँक, शिवाजी रोड, घाणेकर चौक, गांधी मार्केट, सुभाष चौकमार्गे सराफ बाजारातील श्री महालक्ष्मी मंदिराजवळ रथ पोहचेल. तेथे भजनाचा कार्यक्रम होऊन अंबुरावजी कासार, मरिमाता मंदिर, भिलपुरामार्गे संत लालशा बाबा समाधीजवळ रथ थोडावेळ थांबून, समाधीवर पुष्पचादर अर्पण करून दधिची चौक, बालाजी मंदिरमार्गे रथ चौकात रात्री १२ वाजेपर्यंत रथ परत येईल.

रथ राम मंदिराजवळ आल्यानंतर रथावरील उत्सवमूर्ती पालखीत ठेवून वाजतगाजत श्रीराम मंदिरात आणण्यात येईल. रात्री प्रभु श्रीरामांची महाआरती होऊन श्रीराम रथयात्रेची सांगता होईल. प्रत्यक्ष पंढरीचे पांडुरंग या दिवशी जळगावात येतात, अशी भाविकांची श्रद्धा आहे. संत अप्पा महाराज यांनी सन १८७२ मध्ये हिंदू समाजातील १८ पगड जातींना एकत्र करून या रथोत्सवाला प्रारंभ केला. आज १४४ वर्षे झाली, असंख्य भाविकांच्या सहकार्याने रथोत्सवाचा नंदादीप अखंड तेवत आहे. संध्याकाळी सात वाजता संस्कार भारतीचे साधक अभंगवाणी सादर करणार आहेत.

Check Also

news-4

बारा हजार सेटटॉप बॉक्स

आवाज न्यूज नेटवर्क –  अहमदनगर – शहरी भागातात फेज थ्री मध्ये सेटटॉप बॉक्स बसविण्याची कार्यवाही …

Leave a Reply

Your email address will not be published. Required fields are marked *