facebook
Thursday , December 8 2016
Home / Featured / सावकारांच्या जाचामुळे शेतकऱ्याची आत्महत्या
suicide

सावकारांच्या जाचामुळे शेतकऱ्याची आत्महत्या

आवाज न्यूज नेटवर्क –

अहमदनगर – गावातील सावकारांनी घर खर्चासाठी व्याजाने दिलेले पैसे परत न दिल्याने शेतकऱ्यास मारहाण केली. सावकारांच्या या जाचाला कंटाळून बाळासाहेब आनंदराव राळेभात (वय ४५, रा. भूतवडा) या शेतकऱ्याने विष प्राशन करून आत्महत्या केली. या प्रकरणी सावकारकी अधिनियम व आत्महत्येस प्रवृत्त केल्याप्रकरणी आठ जणांविरोधात जामखेड पोलिस स्टेशनला गुन्हा दाखल करण्यात आला आहे.

पोलिसांकडून मिळालेली माहिती अशी, ४ नोव्हेंबर रोजी तालुक्यातील भूतवडा येथील बाळासाहेब राळेभात यांनी घर खर्चासाठी गावातील सावकारकी करणाऱ्या काही लोकांकडून व्याजाने पैसे घेतले होते. हे पैसे परत देऊ शकले नसल्याने

आरोपी विश्वनाथ भिवा डोके, संजय विश्वनाथ डोके, जयसिंग विश्वनाथ डोके, किरण आश्रूबा डोके, उमेश आश्रूबा डोके, अशोक रमेश डोके, आजिनाथ महादेव जगताप, सुधाकर ढाळे या आठ जणांनी राळेभात यांना मारहाण केली. याची धास्ती घेऊन राळेभात यांनी ४ नोव्हेंबर रोजी शेतात विष प्राशन केले. त्यांना नातेवाईकांनी जामखेड येथील ग्रामीण रुग्णालयात दाखल केले. परंतु, प्रकृती चिंताजनक असल्याने डॉक्टरांनी तातडीने नगर येथील जिल्हा रुग्णालयात दाखल करण्यास सांगितले. नगर येथे उपचार सुरू असताना बुधवारी सकाळी त्यांचे निधन झाले. वडिलांच्या मुत्यूस वरील आठ जण कारणीभूत आहेत त्यांच्यावर गुन्हा दाखल करण्यात यावा, अशी मागणी बाळासाहेब राळेभात यांच्या मुलाने केली होती. त्यानंतर तोफखाना पोलिस स्टेशनमध्ये गुन्हा दाखल करण्यासाठी गेले असता गुन्हा दाखल केला नाही. शेवटी नातेवाईकांनी जिल्हा पोलिस अधीक्षक डॉ. सौरभ त्रिपाठी यांच्याकडे तक्रार केली. तेव्हा अधीक्षक यांनी जामखेड येथे फिर्याद दाखल करून घेण्याचे आदेश दिले आणि मुलगा आकाश राळेभात यांनी फिर्याद दिल्यानंतर आरोपींविरोधात जामखेड पोलिसांकडून गुन्हा दाखल करण्यात आला. तोपर्यंत नातेवाईकांनी मृतदेह जामखेड पोलिस स्टेशनसमोर आणला होता. या प्रकरणी अद्याप कोणालाही अटक करण्यात आली नाही.

Check Also

aawaz-news-image

‘पोलिसांची भीती मनातून काढून टाका’

आवाज न्यूज नेटवर्क – जळगाव – कायदा वा नियम हे समाजाच्या भल्यासाठीच असून, त्यांचे जो …

Leave a Reply

Your email address will not be published. Required fields are marked *