facebook
Saturday , December 3 2016
Home / पुणे / ‘पुलोत्सव सन्मानाने मी भरून पावलो’
dsc_0464

‘पुलोत्सव सन्मानाने मी भरून पावलो’

‘या भूतलावर असा एकही मराठी माणूस नसेल, ज्याला पुलंचा स्पर्श झाला नसेल. पुलंच्या नावाचा पुरस्कार मिळाल्याने मी भरून पावलो आहे. सगळे विसरून टाकणारा हा अभूतपूर्ण क्षण आहे,’ अशी भावना प्रसिद्ध शास्त्रीय गायक महेश काळे यांनी शुक्रवारी व्यक्त केली.
आशय सांस्कृतिकतर्फे आयोजित तेराव्या पुलोत्सवात काळे यांना तालयोगी पं. सुरेश तळवलकर यांच्या हस्ते ‘पुलोत्सव तरुणाई सन्मान’ प्रदान करण्यात आला. त्यावेळी ते बोलत होते. अभिनेत्री अश्विनी एकबोटे यांना मरणोत्तर प्रदान करण्यात आलेला पुरस्कार त्यांचे पती प्रमोद एकबोटे यांनी स्वीकारला. उद्योजक कृष्णकुमार गोयल, नयनीश देशपांडे, अतुल शहा, नितीन ढेपे, सतीश जकातदार, वीरेंद्र चित्राव आणि मयूर वैद्य या वेळी उपस्थित होते.
‘माझी आई आणि माझ्यात सारखेपणा कशात आहे, असा विचार करतो तेव्हा पुलंचे नाव डोळ्यासमोर तरळते. दिवसाची प्रत्येक रात्र त्यांच्या पुस्तकाच्या वाचनाने होते. अशा पुलंच्या नावाचा पुरस्कार सर्व काही विसरायला लावणारा आहे. पं. तळवलकर यांच्या हस्ते मिळाल्याने तो दुहेरी मिळाल्यासारखे वाटत आहे,’ असे काळे म्हणाले. पं. तळवलकर म्हणाले, की ‘भारतीय संस्कृतीचा सर्व अंगांनी परामर्श घेऊन पुलंनी लोकांना आनंद दिला. श्रद्धा ठेवणारे भरपूर असतात. श्रद्धेपेक्षा निष्ठा महत्त्वाची असते. कारण निष्ठेमध्ये कर्म असते. गुरूकडून केवळ शिक्षण मिळून चालत नाही तर संस्कार मिळवावा लागतो; ज्याने कलाकाराला नजर प्राप्त होते. अभिषेकी बुवांच्या आशीर्वादामुळे महेशला ती नजर प्राप्त झाली आहे.’ उत्तरार्धात अनघा हरकारे आणि मृण्मयी बऱ्हाटे या शिष्यांनी एकबोटे यांना नृत्यातून गुरूवंदना दिली. काळे यांच्या गायनाची मैफल रंगली. आनंद देशमुख यांनी त्यांच्याशी संवाद साधला. सूत्रसंचालन सुप्रिया चित्राव यांनी केले.

आर्थिक सर्जिकल स्ट्राइक अन् गर्दी
पुलोत्सवातील कार्यक्रमासाठी गणेश कला क्रीडा मंदिर रसिकांनी फुलून गेले होते. या पार्श्वभूमीवर केंद्र सरकारने काळ्या पैशावर केलेल्या सर्जिकल स्ट्राइकच्या या दिवसांमध्ये रसिक एवढी गर्दी करतात. ही पुलंच्या नावाची पावती आहे,’ अशी कोटी पं. तळवलकर यांनी करताच सभागृहात हास्यकल्लोळ झाला.

Check Also

news-5

शिवसेना हा केवळ टक्केवारीचा पक्ष

आवाज न्यूज नेटवर्क – पुणे – ‘शिवसेनेने महाराष्ट्रात जी कामे केली, ती बाळासाहेबांनी केली आहेत. …

Leave a Reply

Your email address will not be published. Required fields are marked *