facebook
Thursday , December 8 2016
Home / जळगाव / बँकांमध्ये आता चलन टंचाई
money

बँकांमध्ये आता चलन टंचाई

पाचशे आणि हजाराच्या नोटा चलनातून बाद केल्यानंतर आता नागरिकांना चलन टंचाई जाणवण्यास सुरुवात झाली असून, बँकांसमोर गुरुवारच्या तुलनेत आज शुक्रवारी जास्त गर्दी दिसून आली. आजपासून बँकांचे एटीम सुरू होणार असल्याचे जाहीर करूनदेखील बहुसंख्य बँकांचे एटीएम बंद होते. त्यामुळे नागरिकांच्या हलाखीत भरच पडली.

मंगळवारी पाचशे आणि हजाराच्या नोटा चलनातून बाद करण्यात आल्याची घोषणा केल्यानंतर बुधवारपासून बाजारपेठेतील व्यवहार ठप्प झाले. नागरिकांच्या हातातील चलन संपत आल्याने मागणी नसल्याचे चित्र आहे. परिणामत: सोने बाजारात आजदेखील उठाव नव्हता. बाजारपेठेतील उलाढाल ही दहा टक्केदेखील होत नसल्याचे सांगण्यात आले. परिणामत: नेहमी प्रचंड वर्दळ असलेली दुकाने, मॉल यातील गर्दी रोडावलेली आज दिसत होती. चित्रपटगृहे मल्टीप्लेक्सलादेखील याचा जोरदार फटका बसला. व्यवस्थापक इंद्रवदन त्रिवेदी यांनी मटाशी बोलताना सांगितले की, पूर्वी प्रेक्षक पाचशेची नोट घेऊनच येत असे. आता या नोटाच बंद झाल्याचा फटका बसला असून, काही शोना केवळ दहा ते पंधरा प्रेक्षक, तर काही शो प्रेक्षकांअभावी बंद ठेवण्याची वेळ आली. आज रथ असूनदेखील प्रेक्षक नव्हते. दरवर्षी रथाच्या दिवशी हाऊस फुल्ल गर्दीत शो चालतात. आज मात्र, स्थिती उलट आहे. बाजारातून शंभराच्या नोटांना प्रचंड मागणी आल्याने त्यादेखील गायब होत असल्याचे दिसून येत आहे. त्यामुळे शंभराच्या नोटा हजाराला सातशे, पाचशेला तीनशे दराने उपलब्ध होत असल्याची चर्चा होती. सरकारने चलनातून बाद केलेल्या पाचशे व हजाराच्या नोटा बँकेत आपल्या खात्यात जमा करण्याचे आदेश दिल्यानंतर गुरुवारी केवळ स्टेट बँकेच्या मुख्य शाखेत १७ कोटी ५५ लाख रुपये जमा झाले होते. पीपल्स बँकेत ५१ कोटी ९७ लाख, जळगाव जनता बँकेत ४४ कोटी रुपये जमा झाले. जिल्हाभरातून एकाच दिवसात तीनशे कोटींवर रक्कम जमा झाल्याचा अंदाज व्यक्त केला गेला.
नागरिकांजवळ असलेले शंभराचे चलन संपत आल्याने त्यांनी चलन बदलीसाठी बँकेत गर्दी केली होती. नोटा खात्यात जमा करणारे मोठ्या प्रमाणावर दिसून येत होते. स्टेट बँकेच्या मुख्य शाखेचे सहाय्यक महाप्रबंधक उदय पानसे यांनी कालच्या तुलनेने आज गर्दी जास्त असल्याने सकाळपासून १६ काउंटर सुरू केल्याचे सांगितले. स्टेट बँकेच्या मुख्य शाखेत दोन एटीएम आणि कॅश डिपॉझिट मशिन सुरू केल्याने काहीशी गर्दी पांगली असल्याचे पानसे यांनी सांगितले. अन्य बँकांमध्येदेखील जादा काउंटर सुरू केलेले दिसत होते. शहरात विविध बँकात शंभराच्या नोटांची चणचण जाणवू लागली आहे. पोस्टातही मोठ्या प्रमाणात ही स्थित जाणवली. जनता बँकेत चार हजाराऐवजी दोन हजार रुपयेच नेण्याचे आवाहन केले जात होते. शंभराच्या चलनाची चणचण होणार हे लक्षात घेऊन गुरुवारीच रिझर्व बँकेकडे या चलनाची मागणी केल्याचे स्टेट बँकेचे उदय पानसे यांनी सांगितले.

कर भरताना बनावट नोटा खपविण्याचा प्रयत्न

जळगाव महापालिकेच्या चारही प्रभागात घरपट्टीचा भरणा करण्यासाठी पाचशे व हजार रुपयांच्या नोटा स्वीकारण्याची मुभा शासनाने दिली होती. त्यानुसार गुरुवार व शुक्रवारी घरपट्टी भरणा रात्री १२ वाजेपर्यंत सुरू ठेवण्याचा निर्णय घेण्यात आला होता. शुक्रवारी दुपारी चार वाजेपर्यंत मनपाच्या चारही प्रभागात मिळून दीड कोटी रुपयांचा करभरणा झाला होता. विशेष म्हणजे थकबाकीदारांनीही जुन्या नोटा संपविण्यासाठी घरपट्टी भरली. या रकमांमध्ये ४० बनावट नोटा आल्याने त्या परत करण्यात आल्यात. महावितरणच्या कार्यालयातदेखील जुन्या नोटा स्वीकारल्या जात असल्याने तेथे बिल भरण्यासाठी रांग लागली होती.

पेट्रोलच्या विक्रीत दीडपटीने वाढ

मंगळवारी पाचशे आणि हजाराच्या नोटा चलनातून बाद होत असताना त्या शुक्रवारी मध्यरात्रीपर्यंत पेट्रोल पंपावर चालतील या घोषणेने नागरिकांनी पेट्रोल पंपावर प्रचंड गर्दी केली होती. त्यामुळे दररोज जिल्ह्यात पेट्रोलची दोन लाख पन्नास हजार लिटर विक्री होते, ती चार लाखांवर गेली. डिझेलची पाच लाख ३० हजार लिटरची होणारी विक्री आठ लाख १५ हजार लिटरवर गेली असल्याचे सागर चौबे यांनी सांगितले. नागरिकांनी आपल्या गाड्यांमध्ये पेट्रोल डिझेल भरून ठेवल्याने आठवडाभर आता विक्री मंदावलेली दिसून येईल अशीही टिपणी त्यांनी केली.

Check Also

आदिवासी तडवी समाजाचा मोर्चा

तालुक्यातील रसलपूर येथील रहिवासी मुबारक तडवी हा जळगाव येथील आदिवासी विद्यार्थी वसतिगृहात शिकत होता. तो …

Leave a Reply

Your email address will not be published. Required fields are marked *