facebook
Saturday , December 3 2016
Home / पुणे / विद्यार्थ्यांच्या खात्यात पैसा जिरवण्याचे ‘उद्योग’
watch-out-that-rs-500-note-may-be-a-fake-one

विद्यार्थ्यांच्या खात्यात पैसा जिरवण्याचे ‘उद्योग’

विद्यार्थी आणि पालकांकडून लाखो रुपये उकळणाऱ्या शिक्षणसम्राटांना नियतीने त्यांच्याच समोर नतमस्तक होण्याची वेळ आणली आहे. विद्यार्थ्यांच्या बँक खात्यांमध्ये आपला काळा पैसा जिरविण्याचा ‘उद्योग’ काही शिक्षण सम्राटांनी सुरू केल्याचे वृत्त आहे.
केंद्र सरकारने एक हजार आणि पाचशे रुपयांच्या नोटांच्या वापरावर मंगळवारी मध्यरात्रीपासून बंदी आणली. या निर्णयामुळे मोठ्या प्रमाणावर बेहिशेबी मालमत्ता गोळा करणाऱ्या मंडळींचे धाबे दणाणले आहेत. विद्यार्थ्यांकडून नियमबाह्य फी उकळणाऱ्या शिक्षणसम्राटांनाही या निर्णयाचा दणका बसला आहे. त्यातून पळवाट शोधताना आपल्याकडे असणाऱ्या विद्यार्थ्यांच्या बँकखात्यांची मदत घेऊन काळा पैसा पांढरा करण्याचा मार्ग त्यांनी शोधला आहे.
मिळालेल्या माहितीनुसार, शहरासह राज्यातील अनेक शिक्षण संस्थांनी या पर्यायाचा विचार सुरू केला आहे. अनेक बड्या संस्थाचालकांच्या स्वतःच्या सहकारी, तसेच खासगी बँकाही आहेत. विद्यार्थ्यांच्या भल्यासाठी या बँकांमध्ये खाती उघडण्याचे आवाहन शैक्षणिक संस्थांमधून केले जाते. नोटांवर बंदी घातल्याने अशाच पद्धतीने आताही विद्यार्थ्यांना आवाहन करण्याची तयारी संस्थांनी सुरू केली आहे. आपल्याकडील ऐवज विद्यार्थ्यांच्या नावे वळता करतानाच, संबंधित बँकांमधून पैसे काढून घेण्याच्या स्लिपही विद्यार्थ्यांकडून भरून घेण्याची तयारी संस्थांनी सुरू केली आहे. पाचशे वा हजार रुपयाच्या नोटा बँकांमध्ये भरल्यास, त्याची संबंधित व्यक्तीच्या नावे नोंद होणार आहे. या बँका कोणत्या प्रकारच्या असाव्यात याचा कोणताही आग्रह सरकारी पातळीवरून धरलेला नाही. नेमकी हीच बाब लक्षात घेत, आपल्या हक्काच्या, आपल्या नातेवाईकांच्या वा आपल्या नियंत्रणाखाली असलेल्या बँकांच्या मदतीने बडे शिक्षणसम्राट व्यवहार करण्याच्या तयारीत असल्याची माहितीही समोर आली आहे.

पन्नास हजार ग्राहकांचा पंधरा कोटींचा भरणा
वीजबिलाच्या रकमेएवढ्या जुन्या पाचशे आणि एक हजार रुपयांच्या नोटा स्वीकारण्यासाठी शुक्रवारी मध्यरात्री १२ वाजेपर्यंत देण्यात आलेल्या मुदतीत बिले भरण्यासाठी नागरिकांनी रांगा लावल्या. सायंकाळी पाच वाजेपर्यंत पुणे परिमंडलातील ५१ हजार वीजग्राहकांनी सुमारे १५ कोटी ५८ लाख रुपयांचा भरणा केला. रात्री उशिरापर्यंत नागरिकांकडून बिलभरणा करण्यात येत होता. पुणे आणि पिंपरी चिंचवड शहरात सायंकाळी पाच वाजेपर्यंत ४२,३१८ वीजग्राहकांनी सुमारे १२.६८ कोटी रुपयांचा भरणा केला. पुणे ग्रामीण मंडलअंतर्गत येणाऱ्या खेड, मावळ, जुन्नर, आंबेगाव आणि मुळशी तालुक्यांतील आठ हजार ७०० वीजग्राहकांनी सुमारे २.९० कोटी रुपयांचा भरणा केला. रात्री उशिरापर्यंत वीजबिल भरणा केंद्रांवर बिल भरण्यासाठी ग्राहकांचा ओघ सुरू होता. प्रादेशिक संचालक संजय ताकसांडे यांनी वीजबिल भरणा केंद्रांतील व्यवस्थेचा वरिष्ठ अधिकाऱ्यांकडून आढावा घेतला. पुणे परिमंडलाचे मुख्य अभियंता रामराव मुंडे यांनी दिवसभरात अनेक वीजबिल भरणा केंद्रांना भेटी देऊन वीजग्राहकांसाठी केलल्या व्यवस्थेची पाहणी केली.

वीजबिल भरण्याच्या मुदतीत वाढ
महावितरणच्या ज्या लघुदाब वीजग्राहकांची वीज बिल भरण्याची मुदत (प्रॉम्ट पेमेंट) नऊ ते १४ नोव्हेंबर या दरम्यान आहे, त्यांना भरणा सोयीचा व्हावा यासाठी मुदतीत वाढ करण्यात आली आहे. संबंधित ग्राहकांना १५ नोव्हेंबरपर्यंत बिले भरता येणार असल्याचे महावितणकडून सांगण्यात आले.

एसटीची प्रवासीसंख्या दहा टक्क्याने घटली
राज्य मार्ग परिवहन महामंडळाच्या (एसटी) बसमध्येही पाचशे आणि हजार रुपयाच्या नोटा न स्वीकारल्याच्या काही घटनांमुळे प्रवाशांमध्ये धाकधूक निर्माण झाली असून, त्याचा फटका सर्वस्वी प्रवाशांची संख्या घटण्यावर झाला आहे. त्यातच बँका आणि एटीएम बंद असल्याने आर्थिक चणचण भासू लागल्याने गेल्या तीन दिवसांत एसटीची प्रवासीसंख्या दहा टक्क्यांनी घटली आहे.
मंगळवारी रात्री पंतप्रधान नरेंद्र मोदी यांनी पाचशे आणि हजार रुपयाची नोट चलनातून बाद केल्याची घोषणा केली. त्यावेळी मात्र, राज्य मार्ग परिवहन महामंडळाच्या बसमध्ये ११ नोव्हेंबरच्या मध्यरात्रीपर्यंत या नोटा स्वीकारण्याचे आदेश देण्यात आले. प्रत्यक्षात मात्र, एसटीमध्ये अनेक ठिकाणी सुट्या पैशांवरून वाहकांनी पाचशे, हजाराच्या नोटा नाकारल्याचे प्रसंग घडले. त्याचा प्रवासी संख्येवर परिणाम झाला असून, गाड्यांची गर्दीही ओसरली आहे.
नोटांबाबतच निर्णय जाहीर झाल्यापासून नागरिकांकडून गरजांचा प्राधान्यक्रम येत आहे. त्यानुसार आवश्यकतेनुसारच प्रवास केला जात आहे. प्रवासादरम्यान पैसे कमी पडल्यास अडचण नको, म्हणून नागरिकांचा शक्यतो प्रवास टाळण्यावर भर देण्यात येत आहे. दरम्यान, एसटी प्रशासनाने काही ठिकाणी वाहकांकडे सुटे पैसे नसल्यास प्रवाशांना डेपोत जाऊन शिल्लक पैसे देण्यात येत आहेत. तेथेही सुट्टे पैसे नसल्यास मनी ऑर्डरने पाठविण्यात येणार असल्याचे एसटीच्या अधिकाऱ्याने सांगितले.

रेल्वेचे प्रवासी कायम

एसटीची प्रवासी संख्या घटली असली तरीही, रेल्वेची प्रवासी संख्या मात्र कायम आहे. मंगळवारी पुण्यातून १५,६०२ प्रवाशांनी तिकीट आरक्षित करून प्रवास केला. बुधवारी (ता. ९) १६, ५०६ प्रवाशांनी आणि गुरुवारी १६,०४० प्रवाशांनी प्रवास केला. यावरून रेल्वेचे तिकीट आरक्षित करणाऱ्या प्रवाशांच्या संख्येत घट झाली नसल्याचे आढळून आले आहे.

Check Also

news-5

शिवसेना हा केवळ टक्केवारीचा पक्ष

आवाज न्यूज नेटवर्क – पुणे – ‘शिवसेनेने महाराष्ट्रात जी कामे केली, ती बाळासाहेबांनी केली आहेत. …

Leave a Reply

Your email address will not be published. Required fields are marked *