facebook
Saturday , April 29 2017
Breaking News
Home / मुंबई / मुलाच्या खेळासाठी आई, आजी ‘मैदानात’

मुलाच्या खेळासाठी आई, आजी ‘मैदानात’

आवाज न्यूज नेटवर्क

मुंबई

लहान मुलांना सोसायटीच्या आवारात क्रिकेट, फुटबॉल, व्हॉलीबॉल यासारखे खेळ खेळण्यास मनाई करण्याच्या बोरीवलीतील हाऊसिंग सोसायटीच्या आक्षेपाविरोधात एका मुलाच्या आई व आजीने महाराष्ट्र बाल हक्क आयोगाकडे धाव घेतल्यानंतर आयोगाने याविषयी चौकशीचे आदेश दिले आहेत. महिला व बालकल्याण विभागाच्या मुंबई उपनगर जिल्ह्याचे अधिकारी व संबंधित पोलिस उपायुक्त यांच्या पथकाने या तक्रारींविषयीची चौकशी करून सत्यता तपासावी आणि त्यावरील अहवालाच्या आधारे योग्य ती कारवाई करावी, असे आदेश आयोगाने नुकतेच दिले आहेत.

हेरंब वहानवाला (१२) या मुलाची आई सोनल व आजी चंद्रिका यांनी गेल्या वर्षी हा प्रश्न आयोगासमोर मांडला होता. त्यांच्या तक्रारीनुसार, बोरीवलीतील कृष्णदीप को-ऑपरेटिव्ह हाऊसिंग सोसायटीच्या व्यवस्थापन समितीने काही रहिवाशांच्या तक्रारींनंतर मुलांना सोसायटीच्या आवारात क्रिकेट, फुटबॉल यासारखे खेळ खेळण्यास मनाई करण्याचा निर्णय घेतला. या निर्णयामुळे हेरंब नैराश्यावस्थेत गेला. समितीचा हा निर्णय लहान मुलांच्या हक्कांवर गदा आणणारा आणि बालहक्क कायद्यातील तरतुदींचे उल्लंघन करणारा आहे, असे म्हणणे त्यांनी अॅड. प्रदीप हवनूर यांच्यामार्फत आयोगापुढे मांडले होते. तर या इमारतीसह पाच इमारतींचे मिळून संकुल असून त्यात एक सामायिक मैदान आहे, त्या मैदानातच मुलांनी मैदानी खेळ खेळावे, असा ठराव सोसायटीने २०१२मध्ये सर्वसाधारण सभेत घेतला होता. मुलांना बॅडमिंटन व अन्य खेळ खेळण्यास सोसायटीत परवानगी दिली होती. त्यामुळे काहीही खेळण्यास मनाई केल्याचा तक्रारदारांचा आरोप बिनबुडाचा आहे, असे म्हणणे सोसायटीने मांडले होते. आयोगाने दोन्ही बाजूंची सुनावणी घेतल्यानंतर निर्णय देताना, वस्तुस्थितीबाबत आयोग चौकशी करू शकत नसल्याने समितीने चौकशी करून आवश्यक कार्यवाही करावे, असे आदेशात स्पष्ट केले.

Check Also

१० कोटी मुलींचा विवाह १८ वर्षांआधीच

देशातील आरोग्याची स्थ‌तिी चिंताजनक असून, देशात दरवर्षी सुमारे १० कोटी ३० लाख मुलींचा विवाह त्यांच्या …

Leave a Reply

Your email address will not be published. Required fields are marked *