facebook
Sunday , April 30 2017
Breaking News
Home / पुणे / मोदींच्या सल्लागारांमुळे नोटांचा गोंधळ

मोदींच्या सल्लागारांमुळे नोटांचा गोंधळ

आवाज न्यूज नेटवर्क

पुणे

‘देशातील भ्रष्टाचाराचे समूळ उच्चाटन करण्यासाठी पंतप्रधान नरेंद्र मोदी यांनी सुरू केलेले प्रयत्न अत्यंत प्रमाणिक आहेत; मात्र एक हजार आणि पाचशे रुपयांच्या नोटा बंद करण्याबाबतची ‘अर्थक्रांती’ची सूचना मोदी सरकारने अर्धवट अंमलात आणली. त्यामुळे सर्वसामान्य जनतेमध्ये निर्माण झालेल्या गोंधळाला पंतप्रधान मोदींचे सल्लागारच जबाबदार आहेत,’ अशी टीका ‘अर्थक्रांती प्रतिष्ठान’चे अनिल बोकील यांनी रविवारी केली.

प्रतिष्ठानतर्फे शनिवारवाड्याच्या परिसरात गेल्या तीन दिवसांपासून आयोजित ‘विनम्र आवाहन’ या उपक्रमाच्या समारोपप्रसंगी बोकील बोलत होते. केंद्र सरकारच्या पाचशे आणि हजार रुपयांच्या नोटा बंद करण्याच्या निर्णयाच्या पार्श्वभूमीवर ‘अर्थक्रांती’च्या वाटचालीच्या पुढील टप्प्यांविषयी बोकील यांनी या वेळी भाष्य केले. प्रतिष्ठानने यापूर्वीच्या काळात मोठ्या किमतीच्या नोटा बंद करण्याबाबत केलेल्या सूचनांचा सरकारने केलेला स्वीकार ही सुरुवात आहे. पुढील काळात प्रतिष्ठानचे अर्थक्रांतीविषयक कार्य केवळ देशापुरते मर्यादित न ठेवता, ‘वसुधैव कुटुंबकम्’च्या धर्तीवर जगभरात पसरविण्याचे संकेतही त्यांनी या वेळी दिले.

बोकील म्हणाले, ‘मोठ्या किमतीच्या नोटा बंद करण्याच्या जोडीने ‘अर्थक्रांती’ने इतर काही महत्त्वाच्या सूचनाही केल्या होत्या. या सूचनांची एकाच वेळी अंमलबजावणी होणे गरजेचे होते. एक हजार, पाचशे रुपयांच्या नोटा बंद करण्याच्या निर्णयाची अंमलबजावणी सुरू झाल्यानंतर अनेक जणांनी आपण प्रमाणिक असतानाही आपल्याला निष्कारण त्रास सहन करावा लागत असल्याची ओरड सुरू केली आहे. ‘अर्थक्रांती’ने सुचवलेल्या मार्गावर चालताना ‘नो एन्ट्री’तून घुसण्याचा मार्ग सरकारने निवडला आहे. त्यामुळे हा गोंधळ सुरू झाला आहे. पंतप्रधान नरेंद्र मोदी निरागस असून, त्यांचे अश्रू हे प्रामाणिक आणि तितकेच खरे आहेत; मात्र त्यांच्या सल्लागारांनी घाई केल्याने, हा गोंधळ निर्माण झाला आहे.’ प्रतिष्ठानचे विश्वस्त यमाजी मालकर, अभिजित धर्माधिकारी यांच्यासह इतर कार्यकर्त्यांनीही या वेळी मनोगत व्यक्त केले.
………………

‘दाऊदही अपराधी नाही…’

‘कोणालाही शिक्षा करा, अशी सूचना ‘अर्थक्रांती’ने केलेली नाही. आमच्या लेखी दाऊदही अपराधी नाही. त्या वेळच्या परिस्थितीमुळे तो तसा बनला. त्यामुळेच देशातील भ्रष्टाचार थांबविण्यासाठी मानसिकता नव्हे, तर परिस्थिती बदलणे गरजेचे आहे,’ असे मत बोकील यांनी या वेळी व्यक्त केले.

Check Also

1)देहूरोडमध्ये बॉम्ब सदृष्य वस्तूचा स्फोट; तीन जखमी 2) स्वाईन फ्लूमुळे पुणे व्हेंटीलेटरवर

Related

Leave a Reply

Your email address will not be published. Required fields are marked *