facebook
Thursday , December 8 2016
Home / Featured / पर्यटनाला २० कोटी रुपयांचा फटका
atm

पर्यटनाला २० कोटी रुपयांचा फटका

आवाज न्यूज नेटवर्क

कोल्हापूर

नोटा रद्द करण्याच्या निर्णयाने कोल्हापूरच्या पर्यटन क्षेत्रालाही मोठा फटका बसला आहे. गेल्या चार दिवसांत जिल्ह्यातील हॉटेल, रेस्टॉरंट व्यवसायाला तब्बल २० कोटी रुपयांहून अधिक फटका बसला आहे. रुम बुकिंगबरोबर जेवण, नाष्ट्याच्या हॉटेलवर परिणाम झाला असून अनेक पर्यटकांनी जिल्ह्यातील पर्यटनाचा बेतही रद्द केल्याने त्याचाही फटका बसला आहे.

नोटा रद्दच्या निर्णयाने साऱ्या क्षेत्रांना व्यापले आहे. त्यामध्ये सामान्य नागरिक ते विविध व्यावसायिक पिचले जात आहेत. अनेकांना काय करावे सुचत नाही. तर व्यावसायिकांकडून दररोज व्यवसाय सुरू केला जातो, पण कुणी फिरकतच नसल्याने सारे व्यवहार ठप्प झाले आहेत. हीच परिस्थिती पर्यटन क्षेत्रातही आहे. पंतप्रधानांनी निर्णय जाहीर केल्यानंतर अनेक पर्यटकांनी कोल्हापूरला येण्याचे टाळले आहे. चार दिवसांत जिल्ह्यातील हॉटेलमधील रुमचे बुकिंग झालेले नाही, असे हॉटेल मालक संघाचे अध्यक्ष उज्वल नागेशकर यांनी सांगितले. त्याचबरोबर ज्या पर्यटकांनी आगाऊ बुकिंग केले होते, त्यांनीही बुकिंग रद्द केले आहे.

या रुम बुकिंगबरोबर जे पर्यटक कोल्हापुरात आले आहेत. त्यांच्याकडेही पैशांची नीट उपलब्धता नसल्याने ते खर्च करु शकत नसल्याने जेवण, नाष्ट्याची हॉटेल तसेच चप्पल ओळीमध्येही खरेदीवर परिणाम झाला आहे. या पर्यटकांकडून वाहने भाड्याने घेतली जातात. त्यांच्यावरही परिणाम जाणवत असून पर्यटनावर आधारित साऱ्या उद्योगाला मोठा फटका बसला आहे. जोपर्यंत पैसे मिळत नाहीत, तोपर्यंत पर्यटक येणार नाहीत हे स्पष्ट आहे. अनेक छोट्या हॉटेलचा व्यवसायही थंडावला आहे. या हॉटेल मालकांकडे सुटे पैसे नसल्याने मोठी अडचण होत आहे. दोन दिवसात शाळा सुरू होणार असल्याने शेवटच्या टप्प्यातील पर्यटनाच्या उत्पन्नावर व्यावसायिकांना पाणी सोडावे लागले आहे.

रविवारचा बाजार शांत

रविवारी आठवडा बाजार रोजंदारीवर काम करणाऱ्या नागरिकांना मोठा आधार असतो. शनिवारी झालेल्या पगारानंतर रविवारच्या बाजारात येऊन जीवनावश्यक वस्तूंची खरेदी केली जाते. मात्र अनेकांचे पगार शनिवारी होऊ शकले नाहीत. ज्यांचे पगार झाले, त्यांना पाचशे रुपयांच्या जुन्या नोटा मिळाल्या आहेत. ते नवीन पैसे घेण्याच्या प्रयत्नात होते. त्यामुळे रविवारच्या आठवडा बाजारावर परिणाम जाणवत होता. नेहमीप्रमाणे गर्दी नव्हती, व्यवहारही फार मोठे झाले नसल्याचे विक्रेत्यांचे मत होते.

काँग्रेसचे आंदोलन

पंतप्रधान नरेंद्र मोदी यांच्या ‘अच्छे दिन’ या प्रचाराची काँग्रेसच्यावतीने रविवारी खिल्ली उडवली. आमदार सतेज पाटील यांच्या नेतृत्वाखाली महापालिकेतील काँग्रेस तसेच राष्ट्रवादीच्या नगरसेवकांनी ठिकठिकाणी बँकांच्या दारात पाणी वाटप करुन केंद्र सरकारच्या निर्णयाचा आगळ्या पद्धतीने निषेध केला. नागरिकांना स्वतःच्या पैशासाठी बँकांच्या दारात ताटकळत उभे राहण्याला ‘हेच का अच्छे दिन?’ असे लिहिलेल्या टोप्या घालून निषेध केला. यामध्ये पदाधिकारी तसेच नगरसेवकांनी आपापल्या प्रभागात निषेध व्यक्त केला.

Check Also

aawaz-news-image

‘पोलिसांची भीती मनातून काढून टाका’

आवाज न्यूज नेटवर्क – जळगाव – कायदा वा नियम हे समाजाच्या भल्यासाठीच असून, त्यांचे जो …

Leave a Reply

Your email address will not be published. Required fields are marked *