facebook
Monday , December 5 2016
Home / मुंबई / पुढील वर्षी येणार ५० बालचित्रपट
children

पुढील वर्षी येणार ५० बालचित्रपट

येत्या वर्षात ‘चिल्ड्रेन्स फिल्म सोसायटी ऑफ इंडिया’तर्फे (सीएफएसआय) ५० नवे-जुने सिनेमे भारतात प्रदर्शित केले जाणार आहेत. ‘सिनेपोलिस’ या सिनेमा चेनसोबत भागीदारी करण्यात आली आहे. १९५५साली स्थापन झालेली सीएफएसआय ही संस्था भारत सरकारच्या माहिती आणि तंत्रज्ञान खात्याअंतर्गत काम करते.

अलीकडच्या काळात बालचित्रपट तयार होत नाहीत, अशी तक्रार होत असतानाच अखेर या पन्नास सिनेमांना प्रदर्शनाचा मुहूर्त लाभला आहे. डिजिटल रूपांतर करण्यात १०० बालपटांपैकी हे सिनेमे आहेत. ‘कलाकृतींना जपण्यासाठी आम्ही काही निवडक सिनेमांचे अद्ययावत अशा डीसीपी-२के फॉरमॅटमध्ये रूपांतर केले आले. त्यामुळे हे बालपट आता मल्टिप्लेक्समध्ये प्रदर्शनासाठी परिपूर्ण झाले आहेत. यातीलच पप्पू की पगडंडी, गोपी गवैया बागा बजय्या, कफल, गट्टू आदी ५० सिनेमे ‘सिनेपोलिस’सोबत पुढच्या वर्षी प्रदर्शित केले जाणार आहेत,’ अशी माहिती चिल्ड्रेन्स फिल्म सोसायटी ऑफ इंडियाचे सीइओ डॉ. श्रवण कुमार यांनी दिली. सीएफएसआयतर्फे सीमा देसाई दिग्दर्शित ‘पप्पू की पगडंडी’, मोहिंदर प्रताप सिंग यांचा ‘एक था भुजंग’, अंजुली शुक्ला दिग्दर्शित ‘हॅपी मदर्स डे’, जुआला छान्गते दिग्दर्शित ‘किमा लोडे’ हे काही नवीन बालपट अलीकडच्या काळात बनवण्यात आले आहेत. वितरणाचा हा प्रयोग यशस्वी झाल्यास येत्या काळात पीव्हीआर, आयमॅक्स यांसारख्यांसोबत सीएफएसआयचा टायअप होणार असल्याचे कुमार सांगतात.

‘एफटीआयआय’सोबत करार

लिटील डायरेक्टर्स विभागाअंतर्गत लहान मुले स्वतः हातात कॅमेरा घेऊन बालपट बनवतात. या लहानग्या फिल्ममेकर्सना मार्गदर्शनासह तांत्रिक सोयी-सुविधा पुरवण्याचे काम आत यापुढे पुण्याचे फिल्म अँड टेलिव्हिजन इन्स्टिट्युट ऑफ इंडिया करणार आहे. तसेच सीएफएसआयने मुंबईतील व्हिसलिंग वूड्स, अहमदाबादचे एनआयडी आणि दिल्लीच्या मारवाह स्टुडियोजसोबत अशाच प्रकार करार केला आहे.

प्रदर्शनासाठी वितरक नाहीत

अडीचशेहून अधिक अर्थपूर्ण बालचित्रपटांचा साठा असताना प्रदर्शनासाठी वितरक नसल्याची खंत कुमार यांनी व्यक्त केली. बालपटांच्या तुलनेत निर्माते गल्लाभरू चित्रपटांना प्राधान्य देत असल्याचे कारण ते पुढे करतात.

कथा नाहीत म्हणून निधी परत!

सीएफएसआयच्या सरकारकडून काय अपेक्षा आहेत, असे विचारल्यावर श्रवण कुमार सांगतात, ‘आश्चर्य वाटेल पण बालपट बनवण्यासाठी निधीचा नाही तर चांगल्या कथांचा अभाव जाणवत आहे. सरकार तर आम्हाला अपेक्षेपेक्षा खूप जास्त मदत करत आहे.’ सीएफएसआयने दोन वर्षांपूर्वी आठ कोटी मागितल्यावर शासनातर्फे दहा कोटी देण्यात आले होते तर गेल्या वर्षी दहा कोटी मागितल्यावर बारा कोटींची निधी मंजूर झाल्याचे समजते. पण चांगल्या कथा सीएफएसआयकडे येत नसल्याने सलग दोन वर्षे संस्थेला मिळणाऱ्या या निधीतील काही रक्कम मंत्रालयाकडे परत करावी लागल्याची माहिती मिळते.

Check Also

news-1

दहावीनंतरच्या करिअरबाबत मार्गदर्शन

आवाज न्यूज नेटवर्क – मुंबई – दहावीची परीक्षा सर्वच विद्यार्थ्यांच्या करिअरमधली अत्यंत महत्त्वाची परीक्षा मानली …

Leave a Reply

Your email address will not be published. Required fields are marked *