facebook
Monday , December 5 2016
Home / Featured / रंगभूमीने व्यवसाय केला सप्तरंगी!
3einstory

रंगभूमीने व्यवसाय केला सप्तरंगी!

आवाज न्यूज नेटवर्क –

औरंगाबाद – रंगमंचावर काम करण्याची आवड होती, पण घर सांभाळून शक्य नव्हते. त्यामुळे त्यांनी आपल्या आवडीचे आपल्या व्यवसायात रुपांतर केले. कलाकारांना लागणाऱ्या अन् सहजासहजी न मिळणाऱ्या वेशभूषेची निर्मिती करून विक्री व किरायाने देणे सुरू केले. आता जिल्ह्यातील सुमारे दीडशे शाळा त्यांच्या संपर्कात आहेत. या आगळ्यावेगळ्या कारभारणीचे नाव आहे अर्चना देवधर. त्यांची ही रंगीत वाटचाल.
उस्मानपुऱ्यातल्या पीरबाजारात भाजीवाली बाईच्या पुतळ्याजवळ अर्चना देवधर यांचे अमेय ड्रेसवेल अँड बुटिक आहे. रंगमंचीय वेशभूषा विकणे, भाड्याने देणे हे त्यांच्या व्यवसायाचे स्वरूप. अर्चना यांचे शिक्षण बीएस्सी आणि डिप्लोमा इन हॉस्पिटल मॅनेजमेंटमध्ये झाले आहे. सुरुवातीच्या काळात त्यांनी हॉस्पिटलमधून काम केले, पण त्यांची नाळ रंगमंचाशी जुळलेली. त्यामुळे या नोकरीत मन रमेना. शाळा-कॉलेजमध्ये असताना त्यांनी विविध नाटकांमधून काम केले. संगीत नाटकातही त्यांनी भूमिका केल्या. याच क्षेत्रात आपण व्यवसाय सुरू केला पाहिजे असे त्यांना सतत वाटू लागले. त्यातून ‘अमेय ड्रेसवेल अँड बुटिक’ हे दुकान सुरू केले.
दुकान सुरू करण्यापूर्वी त्यांनी घरगुती पद्धतीने काम केले. त्यांच्या घराच्याशेजारी राहणाऱ्या एका लहान मुलाला गॅदरिंगसाठी सशाचा ड्रेस शिवून दिला. त्यासाठी घरातील टर्कीश टॉवेलचा उपयोग केला. या ड्रेसमुळे त्या मुलाला गॅदरिंगमध्ये बक्षीस मिळाले. हा ड्रेस अनेकांना आवडला. दहा ते पंधराजणांनी तसाच ड्रेस देवधर यांच्याकडून शिवून घेतला. त्यातूनच त्यांना ड्रेसवेल अँड बुटिक सुरू करण्याची प्रेरणा मिळाली.
देवधर म्हणाल्या, ‘व्यवसायातील काहीच माहित नव्हते. शुन्यातून सगळे उभारायचे होते. माहिती देणारा कुणी नव्हता, पण अशा परिस्थितीत खचून न जाता खंबीरपणे उभे राहायचे ठरविले. मार्ग सापडत गेला. फक्त रंगमंचाच्या आवडीचे पाठबळ होते. लग्नानंतर स्टेजवर काम करणे बंद झाले, पण नाटकाची आवड काही सुटत नव्हती. वेशभूषा उपलब्ध करून देण्याच्या माध्यमातून रंगमंचाशी जोडले गेले. आवड म्हणून नाटक लिहते. अँकरिंग करते. नाटकांसाठी कितीही जास्त वेशभूषा पुरविण्याची मागणी आली, तरी डगमगत नाही. कलाकारांना दिले जाणारे कपडे स्वच्छच असतात. आमचे कपडे घातलेल्या कलावंताला बक्षीस मिळालेच पाहिजे या ध्येयाने हा व्यवसाय करतो. हे कपडे त्या स्वतःच्या दुकानात शिवते. त्यासाठी पाच महिला मदत करतात. प्रसंगी जास्त ड्रेस शिवून द्यावे लागतात. व्यवसाय सुरू करण्यासाठी कर्ज काढले नाही. घरातीलच साहित्य वापरून वेशभूषा तयार करण्याचे काम सुरू केले. आता दुकानात सात हजार ड्रेस आहेत. भारतीय नाटकांसह विदेशी नाटकांसाठीही आम्ही वेशभूषा शिवून देतो. शेक्सपिअर, हॅरीपॉटर या नाटकासाठी अल्पावधीत कपडे शिवले. वेशभूषा विक्री व भाड्याने देण्याचे शहरात पानदरीबा भागात एकच दुकान होते. लोकांना नवीन काहीतरी हवे असते. आम्ही ते देण्याचा प्रयत्न करतो,’ असे त्यांनी सांगितले.
व्यवसाय करताना देवधर यांनी सामाजिक भान देखील जपले आहे. सलग तीन वर्ष मराठवाड्यात दुष्काळ होता. ही जाण त्यांनी ठेवली. जालना जिल्ह्यातील एका गावातील शाळेत गेल्यावर्षी गॅदरिंग होते. शाळेतील विद्यार्थ्यांनी १८ ते १९ प्रकारचे डान्स बसवले होते. डान्ससाठी आवश्यक असलेल्या वेशभूषा भाड्याने घेण्यासाठी त्या शाळेचे शिक्षक देवधर यांच्या दुकानात आले. भाड्यामध्ये काही सवलत द्या, अशी विनंती त्यांनी केली. त्यांच्या बोलण्यातील भावार्थ देवधर यांना कळाला. त्यांनी त्यांची अधिक चौकशी केली, तेव्हा शाळेची आणि मुलांची गॅदरिंग करण्याची इच्छा आहे, पण पुरेसे पैसे नाहीत. दुष्काळामुळे गावात काहीच पिकले नाही, असे त्यांनी सांगितले. त्यामुळे देवधर यांनी त्या शाळेला सर्व वेशभूषा मोफत उपलब्ध करून दिल्या. गॅदरिंग झाल्यानंतर शाळेचे शिक्षक दोन गाड्यांमध्ये बसून भेटायला आले. त्यांनी आभार मानले. ‘व्यवसाय करताना समाजाशी जुळलेली नाळ तुटू नये याची काळजी घेतली पाहिजे, कारण चांगली वेशभूषा न मिळाल्यामुळे एका चांगल्या कलावंताचे करिअर संपुष्टात येऊ शकते. हे होऊ द्यायचे नसेल, तर आपण आपले मन मोठे केले पाहिजे,’ असे त्या सांगतात. ‘येत्या काळात कर्ज काढून संपूर्ण रंगमंच उपलब्ध करून देण्याचे ध्येय आहे. अमेय ड्रेसवेलमध्ये सध्या फक्त वेशभूषाच मिळतात. येत्या काळात नाटकासंबंधीचे लाइटस्, साउंड सिस्टीम, मेकअपमन या गोष्टी एकाच ठिकाणी मिळतील यासाठी आम्ही प्रयत्न करणार आहोत,’ असा निर्धार त्यांनी व्यक्त केला. रंगभूमीच्या या प्रेमाने देवधर यांचा व्यवसायही सप्तरंगी झाला आहे.

Check Also

news-4

बारा हजार सेटटॉप बॉक्स

आवाज न्यूज नेटवर्क –  अहमदनगर – शहरी भागातात फेज थ्री मध्ये सेटटॉप बॉक्स बसविण्याची कार्यवाही …

Leave a Reply

Your email address will not be published. Required fields are marked *