facebook
Tuesday , April 25 2017
Breaking News
Home / नागपूर / पीआयने घेतला शिपायांचा ‘आधार’

पीआयने घेतला शिपायांचा ‘आधार’

आवाज न्यूज लाईन

नागपूर : पंतप्रधान नरेंद्र मोदी यांनी आर्थिकल स्ट्राइक केल्यानंतर भ्रष्ट सरकारी अधिकाऱ्यांनी काळा पैसा मार्गी लावण्यासाठी क्लृप्त्या शोधल्या आहेत. उपराजधातील एका वरिष्ठ पोलिस निरीक्षकाने ‘ब्लॅक’ चे ‘व्हाइट’ करण्यासाठी चक्क शिपायांच्या आधार कार्डचा ‘आधार’ घेतल्याची बहाद्दरी समोर आली आहे.

उत्तर नागपुरातील या अधिकाऱ्याने आठवडाभरापासून शिपायांकडून आधारकार्डची छायांकित प्रत घेणे सुरू केले. एका कर्मचाऱ्याकडून घेतलेल्या छायांकित प्रतवर आवश्यक पैसा मार्गी लावता आला नाही तर काय करावे, यापेक्षा अखत्यारितील प्रत्येक कर्मचाऱ्याकडून चक्क पाच छायांकित प्रत हा पीआय घेत आहे. या छायांकित प्रतच्या आकड्यावरूनच त्याच्याकडील ‘ब्लॅक मनी’ वा ‘डम्प’ केलेला पैसा किती असेल, याची खमंग चर्चा पोलिस जवानांसह संबंधित वर्तुळात सुरू आहे.

हा अधिकारी दुपारपर्यंत पोलिस शिपायांपासून छायांकित प्रत जमा करतो. त्यानंतर तो राऊंडवर निघतो. सायंकाळी बँक बंद होण्याच्या वेळी व्यवस्थापकांना ‘कॅश’ देऊन ‘एक्सचेंज’ करवून घेतो. तीन ते चार तास हा अधिकारी पोलिस स्टेशनमध्ये नसतो. पोलिस निरीक्षक असल्याने हद्दीतील धाकाचा पुरेपूर फायदा तो घेत आहे. साहेबांचा आदेश असल्याने आधार कार्डला नकार देणे शिपायांना परवडणारे नाही. त्यामुळे या पीआयसाहेबांचा नोटा बदलवण्याचा धंदा तेजीत सुरू आहे. हा पीआय अनेक वर्षे नागपुरातच आहे. त्यामुळे ओळखीचाही लाभ त्याला मिळत आहे. पीआयच्या प्रतापाचे पीडितांकडून अनेक किस्से खासगी गप्पांमध्ये खुलेआम रंगत आहेत. साहेबांनी आधार कार्डाच्या पाच छायांकित प्रत मागितल्या. त्या साहेबांना देण्याशिवाय पर्याय नाही. नाही दिल्या तर साहेबांच्या प्रकोपाला बळी पडावे लागेल, असेही पोलिस कर्मचारी खासगीत सांगत आहेत.
एसीबी, आयटीची करडी नजर

आर्थिकल स्ट्राइकनंतर काळा पैसा कमविणाऱ्या व संशयास्पद असलेल्या पोलिस अधिकाऱ्यांवर लाचलुचपत प्रतिबंधक विभाग व आयकर विभागाची करडी नजर आहे. एसीबीकडे याबाबत माहिती आली आहे. त्यामुळे एसीबीने तपासाला सुरुवात केली आहे. पोलिस अधिकाऱ्यासह ज्या शिपायांच्या नावे पैसा काढण्यात आला, त्यांचीही माहिती काढण्यात येत आहे. रोखच बदलवून घेण्यात येत आहे की, याद्वारे सोनेही खरेदी करण्यात आले, याचा शोध घेण्यात येत असून, हा प्रकार अपसंपदेच्या गुन्ह्यात बसतो काय, याची चाचपणीही सुरू असल्याची विश्वसनीय माहिती आहे.

Check Also

अबब! कोल्ड्रींकवर ६६ टक्के अधिक शुल्क

रेफ्रीजरेटरमध्ये ठेवण्यात येणाऱ्या बहुतांश डबाबंद पदार्थांवर अतिरिक्त शुल्क घेण्याचा अनधिकृत पायंडा अनेकांनी घातला आहे. पण, …

Leave a Reply

Your email address will not be published. Required fields are marked *