facebook
Friday , February 24 2017
Breaking News
Home / Featured / मूळव्याध म्हणजे शस्त्रक्रियाच हा गैरसमज!

मूळव्याध म्हणजे शस्त्रक्रियाच हा गैरसमज!

आवाज न्यूज नेटवर्क – 
नागपूर – एखाद्याला मूळव्याध जडला म्हणजे आता फक्त शस्त्रक्रियाच करावी लागेल, हा गैरसमज आहे. आजार प्रारंभिक अवस्थेत असतानाच उपचार घेतले तर औषधांनीही हा आजार बरा होऊ शकतो.

२० नोव्हेंबर हा जगभर ‘पाइल्स डे’ म्हणून साजरा होतो. यात मूळव्याधीविषयी जनजागृती करण्यासाठी विविध कार्यक्रम आयोजित केले जातात. या निमित्ताने सुप्रसिद्ध गुदरोग तज्ज्ञ डॉ. प्रवीण गुप्ता यांच्याशी संपर्क साधला असता त्यांनी संगितले की, असा आजार असलेल्या प्रत्येकाने तपासणी करून घेणे आवश्यक आहे. अॅलोपॅथीशिवाय अन्य उपचारपद्धतीत बहुतांशदा नेमके काय झाले, हे नं पाहता, केवळ रुग्ण जी लक्षणे सांगतो, त्याआधारे औषध दिले जाते. ते चुकीचे आहे. तज्ज्ञांकडून तपासणी करून घेऊन मग वाटल्यास अन्य उपचारपद्धती वापरू शकतो, पण तपासणी आवश्यकच आहे. त्यामुळे त्याला नेमके काय झाले हे कळू शकेल. गुदमार्गाजवळील प्रत्येक त्रासाला मूळव्याध समजणे चुकीचे आहे. या आजाराचे मुख्यत्वे तीन प्रकार असतात. पहिल म्हणजे मूळव्याध किंवा पाइल्स. यात कोंब येतात. त्यातून रक्तस्राव होतो. वेदना नसू शकतात. दुसरा प्रकार म्हणजे गुदभ्रंश किंवा फिशर. या प्रकारात गुदमार्गाजवळ जखम होते. रक्तस्राव कमी असतो. मात्र, वेदना प्रचंड असतात. तिसऱ्या प्रकाराला फिश्चुला किंवा भगंदर म्हणतात. यात गुदमार्गाच्या बाजूला गाठ येते. त्यात पस तयार होतो. पस वाहून गेला की वेदना कमी होतात. त्यामुळे याकडे अनेकदा दुर्लक्ष होते. आधुनिक उपचारपद्धतीत सकाळी दाखल होऊन सायंकाळी घरी जाता येते. त्रासही कमी असतो. मात्र रुग्ण बरेचदा, शस्त्रक्रियाच सांगतील म्हणून किंवा संकोच वाटल्याने डॉक्टरांकडे जात नाही. तसेही डोके, पोट, हृदय या आजारांकडे जेवढे लक्ष दिले जाते, तेवढे मूळव्याधीकडे पूर्वी लक्ष दिले जात नव्हते. रुग्ण व वैद्यकीय शिक्षणातही या आजाराला दुय्यम स्थान होते. मात्र बदलत्या जीवनशैलीत या आजाराचे प्रमाण वाढले आणि जनजागृतीही झाली. त्यामुळे उपचाराच्या वेगवेगळ्या पद्धती विकसित झाल्या.

पुरुष आणि महिला यात मूळव्याधीचे प्रमाण सारखेच किंबहुना महिलांमध्ये थोडे अधिक असल्याचे सांगताना डॉ. गुप्ता म्हणाले की, बाळंतपणानंतर साधारणतः ३० टक्के महिलांना हा आजार होत असतो. मूळव्याधीचे प्रमाण महिलांमध्ये अधिक असले तरी उपचार घेणाऱ्यांमध्ये पुरुषांची संख्या जास्त असते. कारण, तो घरचा कर्तापुरुष असतो. त्यामुळे त्याच्या उपचारांना प्राधान्य दिले जाते. दिवसेंदिवस या आजाराचे प्रमाण वाढतेच आहे. त्याचा परिणाम कार्यक्षमतेवर होत आहे. त्यामुळे वेळीच उपचार करण्याचा सल्लाही डॉ. गुप्ता यांनी दिला.

Check Also

अशोक खरात – प्रभाग क्र. ११ ‘क’ गट राष्ट्रीय समाज पक्षाचे अधिकृत उमेदवार

Click on Below Video Related

Leave a Reply

Your email address will not be published. Required fields are marked *