facebook
Saturday , December 3 2016
Home / मुंबई / मंत्री आणि अधिकाऱ्यांची ‘दुप्पट दिवाळी’
moneysalary

मंत्री आणि अधिकाऱ्यांची ‘दुप्पट दिवाळी’

मुंबई ः दिवाळी सणासाठी उचल देऊन राज्य सरकारी अधिकारी आणि कर्मचाऱ्यांची दिवाळी सुखद करण्याची राज्य सरकारची प्रथा आहे. मात्र, या वेळच्या दिवाळीत राज्याच्या प्रशासनाने चक्क अर्थमंत्री सुधीर मुनगंटीवार यांच्यासह अनेक मंत्र्यांच्या बँक खात्यात दुप्पट मानधन जमा करून मंत्र्यांना आगळी दिवाळी भेट दिली!

एवढेच नव्हे तर मंत्र्यांसोबतच त्यांचे खासगी सचिव, स्वीय सहाय्यक तसेच आस्थापनेवरील कर्मचाऱ्यांच्याही बँक खात्यावर दुप्पट वेतन भरण्यात आले आहे. थेट मंत्र्यांच्या खात्यांवरच दुप्पट रक्कम गेल्यामुळे ती वसूल करण्यासाठी आता राज्याच्या सामान्य प्रशासन विभागाची धावपळ सुरू झाली आहे.

यंदा दिवाळी ऑक्टोबरच्या अखेरच्या आठवड्यात आली. त्यामुळे दिवाळीचे वेतन आणि केंद्र सरकारप्रमाणे राज्य सरकारी अधिकारी आणि कर्मचाऱ्यांना काही महिन्यांचा महागाई भत्ताही दिवाळीपूर्वी देण्यात आला. त्यामुळे राज्य सरकारी अधिकारी आणि कर्मचाऱ्यांच्या हातात दिवाळीत चांगले पैसे होते. मात्र, मंत्री आणि त्यांच्या आस्थापनेवरील खासगी सचिव, स्वीय सहाय्यक, तसेच अन्य कर्मचारी यांच्या बँक खात्यात ऑक्टोबर महिन्याचे दुप्पट वेतन भरले गेले.

मंत्री, राज्यमंत्री, त्यांचे खासगी सचिव, स्वीय सहाय्यक, आस्थापनेवरील कर्मचारी, तसेच राज्य सरकारचे अधिकारी आणि कर्मचारी यांचे मानधन, वेतन आणि भत्ते यासंदर्भात इंडियन बँकेत सरकारचे खाते आहे. त्यांच्या बँक खात्यावर मानधन, वेतन आणि भत्ते जमा होतात.

सुधीर मुनगंटीवार यांच्यासह आणखी काही मंत्र्यांचे मानधन व भत्ते ही ऑक्टोबर महिन्यात दुप्पट भरले गेले असल्याचे इंडियन बँकेच्या निदर्शनास आले. त्यांनी तसे राज्याच्या सामान्य प्रशासन विभागाला कळविले. त्यानंतर संबंधित विभागाला जाग आली. त्यांनी मंत्री, राज्यमंत्री, त्यांच्या आस्थापनावरील अधिकार आणि कर्मचारी, यांचे मानधन, वेतन आणि भत्ते याबद्दलची यादी दोन वेळा पाठविली.
रशासनाने दिलेल्या यादीनुसार इंडियन बँकेने काही मंत्री, राज्यमंत्री, अधिकारी आणि कर्मचारी अशा सुमारे १०५ जणांचे मानधन, वेतन आणि भत्ते ऑक्टोबर महिन्यात त्यांच्या खात्यात दोनदा भरले. यामुळे ऑक्टोबर महिन्यात काही सरकारी कर्मचाऱ्यांचे वेतन बँकेत जमाच होऊ शकले नाही.

कारण दर महिन्याला मंत्र्यांचे मानधन, तसेच सरकारी अधिकारी आणि कर्मचाऱ्यांचे वेतन, भत्ते या संदर्भात ठराविक निधी बँकेकडे जमा होतो. त्यातून हे वेतन आणि भत्ते अधिकारी आणि कर्मचाऱ्यांच्या बँक खात्यावर जमा होते. मात्र, ऑक्टोबरमध्ये काही कर्मचाऱ्यांच्या वेतनाची रक्कम मंत्र्यांच्या बँक खात्यात दोनदा भरण्यात आली. आदिवासी मंत्री विष्णू सावरा यांच्या मंत्री आस्थापनेवरील एका अधिकाऱ्याला काढून टाकण्यात आले आहे. तरीही त्यांच्या बँक खात्यात वेतनाची दुप्पट रक्कम जमा झाली आहे.

मंत्री आणि त्यांच्या आस्थापनेवरील अधिकारी आणि कर्मचाऱ्यांच्या बँक खात्यावर टाकलेली दुप्पट रक्कम आता कशी वसूल करायची, असा प्रश्न आता सामान्य प्रशासन विभागाला पडला आहे. मंत्री आणि अधिकारी आणि कर्मचाऱ्यांना जादा भरलेल्या वेतनाचे धनादेश देण्यास सांगितले आहे. काही मंत्री आणि अधिकाऱ्यांनी हे धनादेश परतही केले आहेत. परंतु अद्याप अनेकांनी सामान्य प्रशासन विभागाच्या आदेशाकडे काणाडोळा केलेला आहे. त्यामुळे बँक खात्यावर गेलेली रक्क्म कशी वसूल करायची असा प्रश्न आहे.

Check Also

news-1

दहावीनंतरच्या करिअरबाबत मार्गदर्शन

आवाज न्यूज नेटवर्क – मुंबई – दहावीची परीक्षा सर्वच विद्यार्थ्यांच्या करिअरमधली अत्यंत महत्त्वाची परीक्षा मानली …

Leave a Reply

Your email address will not be published. Required fields are marked *