facebook
Saturday , December 3 2016
Home / Featured / ४४ पालिकांसाठी आज मतदान
27-november-new-1

४४ पालिकांसाठी आज मतदान

आवाज न्यूज नेटवर्क –

नागपूर – नगर परिषद निवडणुकीच्या पहिल्या टप्प्यात विदर्भातील यवतमाळ, अकोला, वाशीम, अमरावती, बुलडाणा, वर्धा, चंद्रपूर जिल्ह्यातील ४४ नगर परिषदा व एका नगरपंचायतीसाठी आज, रविवारी मतदान होत आहे. युतीची राज्य पातळीवर घोषणा होऊनही जिल्हा पातळीवर स्वतंत्रचा नारा देण्यात आल्याने निवडणुकीतील चुरस वाढली आहे. थेट नगराध्यक्षपदामुळे दावेदारी वाढली आहे. पक्षीय उमेदवारांसोबतच स्थानिक पातळीवरील आघाड्यातील बळ दाखविण्याच्या प्रयत्नात आहेत. सक्षम अपक्ष बंडखोरांमुळेही स्पर्धा वाढली आहे.

सीएमच्या ‘मूल’वर लक्ष

चंद्रपूर : जिल्ह्यात चार नगरपरिषद व एका नगरपंचायतीसाठी निवडणूक होत आहे. यात मुख्यमंत्री देवेंद्र फडणवीस यांचे मूळ गाव असलेल्या मूलचाही समावेश असल्याने संपूर्ण राज्याचे लक्ष याकडे लागले आहे. या बरोबरच राज्याचे अर्थमंत्री सुधीर मुनगंटीवार, केंद्रीय राज्यमंत्री हंसराज अहिर यांच्यासह काँग्रेसचे माजी खासदार नरेश पुगलिया, आमदार विजय वडेट्टीवार यांचीही प्रतिष्ठापणाला लागली आहे. वरोरा नगरपालिकेसाठी शिवसेनेचे आमदार बाळू धानोरकर, राजुरा नगरपालिकेसाठी भाजपचे आमदार संजय धोटे, काँग्रेसचे माजी आमदार सुभाष धोटे यांचीही कसोटी लागणार आहे. बल्लारपूर, वरोरा, मूल, राजुरा या चार नगरपालिकेच्या चार नगराध्यक्षसह एकूण ९१ जागांसाठी मतदान होणार आहे. त्यात बल्लारपूर येथील ३२, वरोरा येथील २४, मूल येथील १७, राजुरा येथील १८ जागांचा समावेश आहे. दरम्यान, नव्याने स्थापन झालेल्या सिंदेवाही नगरपंचायत निवडणुकीसाठी उत्साह दिसून आला असून एकूण १७ प्रभाग आहेत. येथे भाजपचे आमदार बंटी भांगडिया यांनी प्रचार केला. आपलाच पक्ष पहिल्यांदा सत्तेवर आणण्यासाठी विविध पक्षांच्या पदाधिकाऱ्यांसह कार्यकर्ते सर्वशक्तीनिशी आपल्या पक्षाच्या उमेदवारीच्या निवडणूक प्रचाराला लागले होते.

उमेदवारांची संख्या

उमेदवारांची संख्या

नगर परिषद अध्यक्षपद सदस्यपद

बल्लारपूर १४ १७३

मूल ८ ६६

वरोरा १४ १३५

राजुरा ११ ९६

नगरपंचायत

सिंदेवाही ः ८३ (एकूण उमेदवार)

अकोला जिल्ह्यात पंचरंगी सामना

अकोला : जिल्ह्यात अकोट, बाळापूर, मूर्तिजापूर, तेल्हारा आणि पातूर अशा पाच नगरपालिकांची निवडणूक होत आहे. चार आमदार आणि खासदाराच्या जोरावर भाजप विजयाचे आखाडे बांधत आहे. शिवसेनेने आपला आक्रमक बाणा कॅश करण्याच्या प्रयत्नात आहे. काँग्रेस आणि राष्ट्रवादी सक्षम असल्याचे दाखविण्याचा प्रयत्न करीत असले तरी एमआयएमच्या एन्ट्रीने अडचण निर्माण झाली आहे. मतांच्या विभागणीचा धोका व्यक्त होत आहे. भारिप बहुजन महासंघाचा गड असल्याने एकूणच पाचही ठिकाणी चौरंगी, पंचरंगी लढतीची शक्यता आहे. अकोटमध्ये काँग्रेस-राष्ट्रवादीची युती तर भारिप बमसं, भाजप, शिवसेना व एमआयएम स्वतंत्र लढत आहेत. या पाच व्यतिरिक्त पाच उमेदवार रिंगणात असले तरी लढत पक्षीय उमेदवारांमध्येच होणार आहे. तेल्हारा पालिकेत पक्षीय युती नसली तरी स्थानिक आघाड्यांशी युती झाली आहे. नगराध्यक्षपदासाठी सात उमेदवार निवडणूक रिंगणात आहेत. येथे भाजपने शेतकरी सहकार पॅनलसोबत, भारिप बमसंने नगर सेवा समितीशी, काँग्रेस, राष्ट्रवादी, शिवसेना स्वतंत्र तर नगरविकास आघाडीने प्रहार व युवा शक्तीसोबत युती केली आहे. मूर्तिजापूर नगराध्यक्षपद सर्वसाधारण महिलांकरिता आरक्षित निघाल्याने इच्छुकांची अडचण झाली आहे. सहा महिला नगराध्यक्षपदासाठी रिंगणात आहेत. बाळापूर पालिका काँग्रेसचा बालेकिल्ला म्हणून परिचित आहे. मात्र गेल्या वेळी भाजपने सुरुंग लावून नगराध्यक्षपद मिळविले होते. नगराध्यक्षपदासाठी आठ उमेदवार रिंगणात आहेत. काँग्रेसचे माजी आमदार नतिकोद्दीन खतीब यांचे वर्चस्व असलेल्या पालिकेत राष्ट्रवादी व भारिप बमसंने आव्हान दिल्याने चित्र अस्पष्ट आहे. पातूर पालिकेचे नगराध्यक्षपद अनुसूचित जातीच्या महिलेकरिता राखीव निघाल्याने अनेक मुस्लिम नेत्यांच्या उत्साहावर विरजन पडले आहे. या पालिकेवर राष्ट्रवादी काँग्रेसचे वर्चस्व आहे. आठ महिला रिंगणात आहेत. आपसी वाद आणि जातीय समीकरणावर विजयाचे गणित ठरणार आहे.

नगरपालिका जागा उमेदवार

नगरसेवक नगराध्यक्ष

अकोट ३३ १५७ १०

तेल्हारा १७ ७१ ०७

बाळापूर २३ ८९ ०८

पातूर १७ ८० ०८

मूर्तिजापूर २३ १३१ ०६

अचलपूरमध्ये सर्वाधिक उमेदवार
अमरावती : जिल्ह्यातील नऊ नगरपालिकांसाठी ३८३ केंद्रांवर मतदान होणार आहे. निवडणुकीत २ लाख ८४ हजार ७७१ मतदार मतदानाचा हक्क बजावणार आहेत. अचलपूरमध्ये सर्वाधिक उमेदवार रिंगणात आहेत. तेथे १०९ मतदान केंद्र आहेत. निवडणुकीत ५३६ महिला रिंगणात आहेत. भाजप व शिवसेनेची केवळ धामणगांव रेल्वे येथे युती आहे. काँग्रेस व राष्ट्रवादी देखील स्वतंत्ररित्या लढत आहेत. भारिप बमसं, बसप व एमआयएमसारखे पक्ष, आमदार बच्चू कडू यांचा प्रहार तर आमदार रवी राणा यांचा युवा स्वाभिमानी पक्ष निवडणुकीच्या सारीपाटावर नशीब अजमावित आहेत. निवडणुकीची सर्व तयारी झाली असून सकाळी ७ वाजतापासून मतदानाला सुरुवात होणार आहे. पोलिसांचा तगडा बंदोबस्त निवडणुकीसाठी लावण्यात आला आहे. अचलपूर, मोर्शी, वरूड सारख्या अतिसंवेदनशील शहरात अतिरिक्त बंदोबस्त नेमण्यात आला आहे. भाजप, काँग्रेस, राष्ट्रवादी, शिवसेना, बसप, बारिप बमसं, एमआयएम, प्रहार यांच्यासह स्थानिक विकास आघाडीचे उमेदवार भाग्य आजमावित आहेत.
नगरपालिका नगराध्यक्ष नगरसेवक

अचलपूर ०७ २२२

चांदूर बाजार ०४ ७२

अंजनगाव सुर्जी १२ १४८

दर्यापूर ०७ १०९

वरुड १२ ११४

मोर्शी ०७ १२८

शेंदूरजना घाट १२ ८१

चांदूर रेल्वे ०६ १०२

धामणगाव रेल्वे ०५ ४४

एकूण ७२ १०५३

नगराध्यपदाच्या आड प्रतिष्ठा पणाला

बुलडाणा : जिल्ह्यातील नऊ पालिकांच्या ६४ नगराध्यक्षपदासाठी तर ९३३ नगरसेवकपदांसाठी मतदान होत आहे. नगराध्यक्षपदाच्या आड जिल्ह्यातील सर्वच राजकीय पक्षांच्या दिग्गजांची प्रतिष्ठा पणाला लागली आहे. खामगावात पालकमंत्री भाऊसाहेब फुंडकर विरुद्ध माजी आमदार दिलीपकुमार सानंदा असा नेहमीचा सामना दिसणार आहे. यासोबतच शिवसेनेचे संपर्क प्रमुख खासदार प्रतापराव जाधव, काँग्रेस जिल्हाध्यक्ष आमदार राहुल बोंद्रे, राष्ट्रवादीचे माजी मंत्री डॉ. राजेंद्र शिंगणे, भाजपचे जिल्हाध्यक्ष धृपदराव सावळे, आमदार हर्षवर्धन सपकाळ, चैनसुख संचेती, डॉ. संजय कुटे यांना विजयाचे गणित आखत वर्चस्व सिद्ध करावे लागणार आहे. हजार आणि पाचशे रुपयांच्या नोटाबंदीमुळे चार ते पाच दिवस सर्वत्र केवळ नोटांचीच चर्चा असल्याने निवडणुकीच्या प्रचाराकडे नागरिकांचे काही प्रमाणात दुर्लक्ष झाले होते. परंतु हळुहळू वातावरण निवळले आणि प्रचाराने वेग घेतला. शहराचा प्रथम नागरिक अर्थातच नगराध्यक्षाची निवड थेट जनतेतून होणार असल्याने यावेळच्या निवडणुकीला विशेष महत्व प्राप्त झाले आहे.

नगर परिषद नगराध्यक्ष नगरसेवक

बुलडाणा ०८ १५४

चिखली ०६ ११०

देऊळगाव राजा ०७ ६९

मेहकर ०७ ९३

खामगाव ०६ १०८

शेगाव ०९ १०४

जळगाव जामोद ०४ ९४

मलकापूर १२ १४८

नांदुरा ०५ ७८

एकूण ६४ २२४

दोनमध्ये थेट तर चार ठिकाणी बहुरंगी

वर्धा : जिल्ह्यातील सहाही पालिकांच्या निवडणुकीचा प्रचार अंतिम टप्प्यात असताना रंगत निर्माण होऊन देवळी आणि हिंगणघाट येथे थेट दोन पक्षात तर चार ठिकाणी बहुकोणी लढत होत आहे. यातील अपक्ष महत्त्वपूर्ण ठरत आहेत. नगराध्यक्षपदाची निवडणूक थेट जनतेतून होत असल्यामुळे लढतींकडे जिल्ह्यातील जनतेचेच नव्हे, राजकीय समीक्षकांचेही लक्ष लागले आहे. वर्ध्यात नगराध्यक्षपदासाठी १४ उमेदवार रिंगणात असले तरी अंतिम लढत नेमकी कुणात होणार याबाबत अद्याप अनिश्‍चितता आहे. मतदारांच्या विभागणीवर उमेदवारांचे भवितव्य अललंबून आहे. देवळीत एकीकडे खासदार रामदास तडस व भाजप जिल्हाध्यक्ष राजेश बकाने, तर दुसरीकडे आ. रणजित कांबळे हे दिग्गज अप्रत्यक्षरित्या आमने-सामने आहेत. खासदार तडस हे निवडणुकीचा बिगूल वाजल्यापासून देवळीत तळ ठोकून आहेत. रणजित कांबळे आणि महिला काँग्रेस कमिटीच्या प्रदेशाध्यक्ष चारुलता टोकस यांनीही नगराध्यक्षपदाच्या निवडणुकीसाठी कंबर कसली आहे. हिंगणघाट पालिकेच्या नगराध्यक्षपदाच्या निवडणुकीत राकाँचे उमेदवार अॅड. सुधीर कोठारी आणि भाजपाचे उमेदवार प्रेम बसंतानी यांच्यात थेट लढतीचे चित्र असले तरी अन्य उमेदवारांच्या मिळणाऱ्या मतांवर निवडणुकीचे अंतिम चित्र ठरणार आहे. माजी राज्यमंत्री व शिवसेनेचे उपनेते अशोक शिंदे यांच्यासाठी ही अस्तित्वाची लढाई आहे. पुलगावात काँग्रेस, भाजप, शिवसेना व बसपात चुरस आहे. सिंदी पालिकेत काँग्रेसचे वर्चस्व राहिलेले आहे. थेथे भाजप, राष्ट्रवादी आणि काँग्रेस असे तिन्ही पक्षाचे उमेदवार खाटिक समाजाचे आहेत. आर्वीत आमदार अमर काळे आणि माजी आमदार दादाराव केचे यांच्यासाठी प्रतिष्ठेची बनली आहे.

गड राखण्यासाठी काँग्रेसची धडपड

यवतमाळ : दारव्हा, दिग्रस, पुसद, यवतमाळ, उमरखेड, घाटंजी, वणी, आर्णी या नगर परिषदेच्या निवडणुकीसाठी मतदान होत आहे. प्रशासकीय यंत्रणा सज्ज झाली आहे. ८ नगर परिषदांतील १०५ प्रभागातील २१५ सदस्यांसाठी व आठ नगराध्यक्षपदासाठी ही निवडणूक होत आहे. यात ४ लाख ६९ हजार ८३१ मतदार आपला हक्क बजावणार आहेत. ५६ सदस्य असलेली व २ लाख ३३ हजार ४०५ मतदार असलेली यवतमाळ नगर परिषद ही विदर्भात सर्वात मोठी नगर परिषद आहे. त्यामुळे सर्वच राजकीय पक्षासाठी यवतमाळची निवडणूक महत्वाची ठरली आहे. भाजपच्या रेखा कोठेकर, सेनेच्या कांचन चौधरी, काँग्रेसच्या संध्या सव्वालाखे यांच्यात तिहेरी लढत होत आहे. काँग्रेसची पारंपरिक एमआयएम व बसपकडे वळण्याची शक्यता काँग्रेससाठी चिंतेची बाब आहे. वणीमध्ये काँग्रेस, शिवसेना, भाजप, राष्ट्रवादी व मनसे यांच्यात लढत होत आहे. पुसदमध्ये नाईक कुटुंबीयांसाठी निवडणूक महत्वाची आहे. मनोहर नाईक यांच्या पत्नी अनिता निवडणूक रिंगणात आहे. ‘विकास नंतर आधी परिवर्तन’ या मुद्यावर जोर दिला जात आहे. आर्णी व घाटंजी या नगर परिषद काँग्रेसच्या ताब्यात आहेत. त्यावर काँग्रेसची सत्ता पुन्हा येण्यासाठी माजी मंत्री शिवाजीराव मोघे जीवाचे रान करीत आहेत. काँग्रेससाठी ही निवडणूक महत्त्वाची आहे. कारण येत्या दोन महिन्यानंतर जिल्हा परिषदेच्या निवडणूक होत आहेत. त्यामुळे या निवडणुकीत विजय मिळाल्यास कार्यकर्त्यांमध्ये नवजोश निर्माण होईल. अन्यथा काँग्रेसचा हा गड पूर्णत: ढासळेल, अशी शक्यताही व्यक्त होत आहे.

शेवटपर्यंत संदिग्धता

वाशीम : जिल्ह्यातील मंगरुळपीर, कारंजा आणि वाशीम नगर परिषदेसाठी मतदानाच्या पूर्वसंध्येलाही संदिग्धता कायम होती. बहुरंगी लढत, त्यात भारिप बमसं आणि एमआयएमच्या एन्ट्रीने अनपेक्षित निकालाची शक्यता व्यक्त होत आहे. वाशीम नगर परिषद अध्यक्षपदासाठी ११ तर नगरसेवकांसाठी १३६ उमेदवार निवडणूक रिंगणात आहेत. सेनेकडून सर्वप्रथम माजी नगराध्यक्ष अशोक हेडा यांची उमेदवार म्हणून उमेदवारी जाहीर झाली तर भाजपाकडून डॉ. हरीश बाहेती तर काँग्रेसकडून राजू वानखेडे यांची उमेदवारी शेवटच्या क्षणी जाहीर झाली. याशिवाय अपक्ष सतीश वानखेडे, राकाँचे माधवराव अंभोरे, भारिप बमसंचे शेख फिरोज, एमआयएमकडून आसिफ खान हे उमेदवार आहेत. मंगरुळपीरमध्ये भाजपच्या लता चितलांगे, राष्ट्रवादीकडून माजी नगराध्यक्ष किरण परळीकर, काँग्रेसकडून माजी नगराध्यक्ष बानो रहिम चौधरी तर भारिप बमसंकडून डॉ. खान यांच्यासह सहा उमेदवार निवडणूक रिंगणात आहेत. कारंजा नगर परिषद निवडणुकीत अध्यक्षपदाचे १२ उमेदवार तर २८ नगरसेवकपदासाठी १३८ उमेदवार निवडणूक रिंगणात आहेत. काँग्रेसकडून दिलीप भोजराज, सन्मान आघाडीकडून विनोद रावळे, भाजप राजेश्वर पिंगळे, सेनेकडून योगेश इंगळे, राष्ट्रवादीकडून पवन बोडेंसह १२ उमेदवार रिंगणात आहेत. सर्वच नेत्यांनी प्रचारसभा घेत राजकीय वातावरण तापविले.

Check Also

news-24

हिंसामय गुन्ह्यांत नगर राज्यात टॉपला

आवाज न्यूज नेटवर्क – अहमदनगर – खून, दरोडे, बलात्कार अशा हिंसामय गुन्ह्यांत कायम अशांत असणारा …

Leave a Reply

Your email address will not be published. Required fields are marked *