facebook
Tuesday , January 24 2017
Breaking News
Home / पुणे / पुरुषोत्तम महाअंतिम फेरी सुरू

पुरुषोत्तम महाअंतिम फेरी सुरू

पुरुषोत्तम करंडक महाअंतिम फेरीला मोठ्या उत्साहात सुरुवात झाली आहे. महाअंतिम फेरीला कुडाळ येथील संत राऊळ महाराज महाविद्यालयाच्या ‘मैत’ या एकांकिकेच्या सादरीकरणाने सुरुवात झाली. राज्यभरातील पाच केंद्रांवरील १८ विजेते त्यांच्या एकांकिका सादर करणार आहेत.
विजय दळवी लिखित मैत ही एकांकिका जातिव्यवस्थेवर भाष्य करणारी होती. राऊळ महाविद्यालयाचा विद्यार्थी विश्वजित पालव याने या एकांकिकेचे दिग्दर्शन केले होते. काही वर्षांपूर्वी समाजात स्पृश्य आणि अस्पृश्य असा भेद केला जात होता. जातीनुसार, वर्णानुसार लोक विभागले गेले होते. त्याच काळातील ही कथा होती. रूढी, परंपरा यांच्या विळख्यात माणूसपण जपले पाहिजे, याची जाणीव या एकांकिकेने करून दिली. त्यानंतर अमरावती येथील श्री शिवाजी कला व वाणिज्य महाविद्यालयाच्या विद्यार्थ्यांनी ‘१४ एप्रिलची रात्र’ ही एकांकिका सादर केली. स्पर्धेच्या पहिल्या दिवशीच्या सत्रात दोनच एकांकिकांचे सादरीकरण झाले. आज (९ डिसेंबर) दोन सत्रांमध्ये स्पर्धा पार पडणार असून, सकाळी नऊच्या सत्रात पु. ओ. नहाटा वाणिज्य महाविद्यालय, भुसावळ यांची ‘धागा’, इचलकरंजी नाइट कॉलेजची ‘प्रेम अ-भंग’, आणि नॉर्थ महाराष्ट्र नॉलेज सिटी, जळगावची ‘सांबरी’ या एकांकिका रंगणार आहेत. संध्याकाळी पाच वाजताच्या सत्रात राजेंद्र माने पॉलिटेक्निक कॉलेज, देवरूख यांची ‘रसिक’, सी. पी. अँड बेरार कॉलेज, नागपूर यांची ‘अनोळखी ओळख’, आणि शिवाजी विद्यापीठ नृत्य व संगीत विभाग, कोल्हापूरची ‘अजन्म’ ही एकांकिका रंगणार आहे.
————————
पुणेकर तरुणांची स्पर्धेकडे पाठ
पुरुषोत्तम करंडक महाअंतिम फेरीमध्ये पुण्यासह राज्यातील इतर कलाकारांच्या दर्जेदार एकांकिका पाहायला मिळतात. मात्र, यंदाच्या वर्षी पहिल्याच दिवशा सादर होणाऱ्या दोन एकांकिकांना अत्यंत कमी प्रेक्षक होते. स्पर्धेसाठी आलेल्या इतर स्पर्धकांचीच संख्या सभागृहात जास्त होती. शनिवार, रविवारच्या दिवशी पुण्याचे संघ सादरीकरण करणार असल्याने त्या वेळी गर्दी होईल, असे संयोजकांचे म्हणणे आहे. मग बाहेरून आपली कला सादर करण्यासाठी आलेल्या स्पर्धकांना पुणेकरांनी प्रोत्साहन द्यायचे नाही का ? असा प्रश्न उपस्थित झाला आहे. याच दरम्यान पुण्यात सुरू असलेल्या सवाई गंधर्व महोत्सवामुळे देखील कदाचित तरुणांनी या स्पर्धेकडे पाठ फिरवल्याची चर्चा आहे.

Check Also

विकास कामे झाली, पण ठराविक लॉबीचीच झाली – यशवंत भोसले

Click on Below Video Related

Leave a Reply

Your email address will not be published. Required fields are marked *