facebook
Wednesday , May 24 2017
Breaking News
Home / Featured / मृत मुलांचा अहवाल नाहीच

मृत मुलांचा अहवाल नाहीच

आवाज न्यूज नेटवर्क –

कोल्हापूर – शाहूवाडी तालुक्यातील शित्तूर तर्फ मलकापूर येथील आधार वसतिगृहातील मुलांच्या छळछावण्याचे प्रकरण उघडकीस येऊन एक महिना उलटला. तेथील दोन अनाथ मुलींचा मृत्यू होऊन चार महिने पुर्ण झाले. पण त्यांच्या मृतदेहाचे शवविच्छेदनाचा अहवाल, मृत्यूचे नेमके कारण याबद्दल प्रशासन अजूनही अनभिज्ञ आहे. याबाबत कोण‌तीही अधीकृत माहिती दिलेली नाही.

आधार वसतिगृहातील ‘गांधी’ नावाची अनाथ मुलगी आजारी पडल्याने उपचारासाठी येथील सीपीआरमध्ये चार नोव्हेंबर रोजी दाखल करण्यात आले. उपचार सुरू असतानाच पाच नोव्हेंबर रोजी तिचा मृत्यू झाला. त्यानंतर कुपोषणग्रस्त अशा २० ते २५ विद्यार्थ्यांना सीपीआरमध्ये उपचार दाखल केले. उपचारानंतर ते बरे झाले. त्यानंतर वसतीगृहातील कारभाराची चौकशी झाली. प्राथमिक टप्यात अनेक धक्कादायक गोष्टी बाहेर आल्या. गांधीचा मृत्यू होण्यापुर्वीच दोन अनाथ मुलींचा मृत्यू झाला आहे, हे लपवून ठेवलेले बाहेर आले. त्यानंतर प्रकरणाने गंभीर वळण घेतले. संस्थापकास पोलिसांनी अटक केली.

वसतिगृहातील झेबी नावाच्या गतिमंद मुलीचा तीन ऑगस्ट तर प्रेरणा भीमराव बनसोडे या अस्थ‌िव्यंग मुलींचा १९ ऑगस्ट २०१६ रोजी मृत्यू झाला. दोन मुलींचा मृत्यू झाल्यानंतर पोलिस प्रशासनाकडे नोंद करून सीपीआरमध्ये शवविच्छेदन करणे बंधनकारक होते. नियमाप्रमाणे शवविच्छेदन झाले असते तर मृत्यूचे नेमके कारणही स्पष्ट झाले असते. पण आतापर्यंतच्या समाजकल्याण प्रशासनाच्या चौकशीत यासंबंधीची कोणतीही माहिती मिळालेली नाही. वसतिगृहाची नियमानुसार मान्यता २०१४ साली संपली होती. त्यानंतरही वसतिगृह सुरूच ठेवले.

प्रशासनाने वसतिगृह चालवण्याचा आर्थिक स्रोत कोणता होता त्याचा शोध घेण्याचा प्रयत्न केला. त्यावेळी संस्था चालकाने देणगीतून असे उत्तर दिले. देणगी दिलेल्याची पावत्या, धर्मादायकडे काही नोंदी आहेत का? अशी माहिती प्रशासनाने घेतली. त्यावेळी देणगीतून वसतीगृह चालत होते, त्याचा कोणताही पुरावा मिळाला नाही. मुंबईच्या बाल कल्याण समितीकडून संस्थेने बेकायदेशीरपणे ३८ मुले वसतिगृहात आणली हे उघड झाले. मुंबईच्या समितीने येथील समितीला त्याची माहिती दिल्याचेही सांगितले. पण येथील समितीने हे उडवून लावले आहे. परिणामी वसतिगृहातील अनाथ अपंग, गतिमंद, अस्थ‌िव्यंग मुलांच्या जीवनाशी खेळ सुरू राहिला.

‘अनाथपणा’मुळे बेदखल

वसतिगृहात १८ गतिमंद, १५ मूकबधीर, ५ अस्थ‌िव्यंग मुले होती. त्यातील तीन वगळात सर्व अनाथ होती. अनाथ असल्याने त्यांची होणाऱ्या हेळसांडपणाकडे दुर्लक्ष झाले. त्यांना सांगण्यासाठी ‘आवाज’ नव्हता. तिघांचा मृत्यू झाल्यानंतर प्रशासनापर्यंत त्यांचा ‘आवाज’ पोहचला. दोन मुलींचा मृत्यू ज्याप्रमाणे दडपण्यात संस्थाचालक यशस्वी झाले त्याप्रमाणे ‘गांधी’चे झाले असते अजून वसतिगृहातील आणखी किती जणांच्या वाट्याला आले असते याचाही विचार होणे गरजेचे आहे.

तर खरे बाहेर येणार

दोन मुलींचा मृत्यू कशाने झाला, त्यांचे शवविच्छेन केले होते की नाही, मृतदेहाची कशी विल्हेवाट लावली या सर्व महत्त्वाच्या प्रश्नांची उकल झालेली नाहीत. प्रशासनाने या प्रश्नांची उत्तरे शोधल्यानंतर सरकारी अनुदान नसतानाही वसतिगृह कोणत्या उद्देशासाठी चालवले गेले हे समजणार आहे. पण प्रकरण उघड होऊन एक महिना झाला तरी प्रशासन अजून या प्रश्नाची उत्तरे शोधण्याच्या दिशेने वाटचाल केलेली नाही.

कोट

‘आधार’मधील तीन मुलींचा मृत्यू झाला. तिसऱ्या मुलींच्या मृत्यूनंतर आधीच्या दोन मुलींच्या मृत्यू झाल्याचे समोर आले. दरम्यान, दोन मुलींचा मृत्यू कशाने झाला, शवविच्छेदन झाले किंवा नाही याची माहिती घेण्यात येणार आहे.

प्रदीप भोगले, समाजकल्याण अधिकारी

Check Also

1)देहूरोडमध्ये बॉम्ब सदृष्य वस्तूचा स्फोट; तीन जखमी 2) स्वाईन फ्लूमुळे पुणे व्हेंटीलेटरवर

Related

Leave a Reply

Your email address will not be published. Required fields are marked *