facebook
Sunday , March 26 2017
Breaking News
Home / नागपूर / टेकडी मंदिराचा जीर्णोद्धार जानेवारीत

टेकडी मंदिराचा जीर्णोद्धार जानेवारीत

शहरातील प्रसिद्ध टेकडी गणेश मंदिराच्या जीर्णोद्धाराचे काम १५ जानेवारी, तिळी चतुर्थीनंतर सुरू करण्यात येणार आहे, अशी माहिती मंदिर प्रशासनाने मुंबई हायकोर्टाच्या नागपूर खंडपीठाकडे सादर केली आहे.

टेकडी गणेश मंदिराच्या जीर्णोद्धाराचे काम तातडीने सुरू करण्यात यावे, अशी विनंती करणारी जनहित याचिका श्याम अग्रवाल यांनी हायकोर्टात सादर केली. त्यावर न्या. भूषण गवई आणि न्या. विनय देशपांडे यांच्या खंडपीठासमोर सुनावणी झाली.

मंदिर व्यवस्थापनातील अंतर्गत वादामुळे मंदिराच्या विकासाचे काम रखडले असल्याचा दावा याचिकेत करण्यात आला होता. महापालिकेने मंदिराच्या विकास आराखड्याला ऑक्टोबर २००८ मध्येच परवानगी दिली होती. विकास कामांसाठी लागणारा १५ कोटीचा निधीही उपलब्ध करून देण्यात आला होता. त्यानंतरही मंदिराचे काम सुरू करण्यात येत नसल्याचा आक्षेप याचिकेत घेण्यात आला.

दरम्यान, मंदिराच्या विकास कामाचा सुधारित आराखडा महापालिकेने मंजूर केला होता. त्या आराखड्याला संरक्षण मंत्रालयाची परवानगी मिळणे आवश्यक होते. त्यामुळे हायकोर्टाने संरक्षण मंत्रालयाला प्रतिवादी करून विकास आराखड्याला परवानगी देण्याबाबत आदेश दिला होता. त्यानुसार संरक्षण मंत्रालयानेही सुधारित आराखडा मंजूर केला आहे. त्यामुळे आता मंदिरातील विकास कामे १५ जानेवारीपासून सुरवात करण्यात येणार असल्याचे मंदिर प्रशासनाने हायकोर्टाला कळविले आहे.

तिळी चतुर्थीला मंदिरात मोठ्या संख्येने भाविक गणपती दर्शनाकरिता येतात. त्यामुळे त्यापूर्वी विकास कामे सुरू केल्यास भाविकांना त्रास होण्याची शक्यता आहे. त्यामुळे तिळी चतुर्थीचा उत्सव झाल्यानंतर विकास कामांना सुरूवात होणार असल्याचे हायकोर्टाला कळविण्यात आले आहे.

Check Also

अबब! कोल्ड्रींकवर ६६ टक्के अधिक शुल्क

रेफ्रीजरेटरमध्ये ठेवण्यात येणाऱ्या बहुतांश डबाबंद पदार्थांवर अतिरिक्त शुल्क घेण्याचा अनधिकृत पायंडा अनेकांनी घातला आहे. पण, …

Leave a Reply

Your email address will not be published. Required fields are marked *