facebook
Sunday , February 26 2017
Breaking News
Home / Featured / दूध कॅन वाटप योजनेला फटका

दूध कॅन वाटप योजनेला फटका

आवाज न्यूज नेटवर्क –

अहमदनगर – विविध विकास योजनांचा निधी थेट लाभार्थ्यांच्या खात्यावर जमा करण्याच्या निर्णयाचे परिणाम जिल्हा परिषदेत दिसू लागले आहेत. जिल्हा परिषदेकडे लाभार्थ्यांचे खाते नंबर उपलब्ध नसल्याने निधी जमा करणे शक्य नसल्याचे लक्षात आल्यानंतर, या योजनांचा निधी आता दुसऱ्या योजनांना देण्याचे प्रकार सुरू झाले आहेत. पशुसंवर्धन विभागाच्या दूध कॅनवाटप योजनेस याचा फटका बसला असून ही योजनाच बंद केली गेली आहे. या योजनेचा २० लाखांचा निधी अन्य योजनांना देण्यात आल्याची माहिती मिळाली आहे. त्यामुळे शेतकऱ्यांना झेडपीकडून मिळणारे प्लॅस्टिकचे दुधाचे कॅन आता दुरापास्त झाले आहेत.
स्थानिक स्वराज्य संस्थांच्या वैयक्तिक लाभाच्या योजनांत लाभार्थ्यांस साहित्य देण्यास सरकारने बंदी घातली आहे. त्याऐवजी योजनांचे अनुदान थेट लाभार्थ्यांच्या खात्यावर जमा करण्याचे आदेश दिले आहेत. या निर्णयामुळे जिल्हा परिषदेची अडचण झाली आहे. सरकारने निर्णय घेतला त्या वेळी काही योजनांचे टेंडर प्रसिद्ध झाले होते, तर काही योजनांची टेंडर प्रक्रिया सुरू होती. आता मात्र हे सर्वच काम थांबण्याशिवाय दुसरा पर्याय नाही.
वैयक्तिक लाभाच्या योजनांत लाभार्थ्यांना थेट साहित्य दिले जात असल्याने त्यांचे बँक खाते नंबर घेण्याचा प्रश्न निर्माण झाला नव्हता. त्यामुळे खाते नंबर नसल्याने नव्या आदेशानुसार लाभार्थ्यांच्या खात्यात निधी जमा करणे अशक्य झाले आहे. शिवाय, खाते नंबर घेण्यासह अन्य अनुषंगिक काम लवकरात लवकर होणे अवघड दिसत असल्याने लाभाच्या योजनांच्या निधीचे पुनर्नियोजन करून दुसऱ्या योजनांना देण्यास प्राधान्य दिले जात आहे. जिल्हा परिषदेतील सर्वच विभागातील अधिकारी या कामात गुंतले आहेत.

झटपट वळवला निधी

पशुसंवर्धन विभागाकडून दूध उत्पादक शेतकऱ्यांना दरवर्षी मोफत प्लास्टिक कॅन दिले जातात. यावर्षी या योजनेसाठी २० लाख रुपयांची तरतूद करण्यात आली. योजनेसाठी ई-टेंडर प्रसिद्ध केल्यानंतर मात्र यास प्रतिसाद मिळाला नाही. त्यामुळे पुन्हा टेंडर प्रसिद्ध करण्यात आले. या वेळी प्रतिसाद मिळेल अशी शक्यता असतानाच, राज्य सरकारचा निर्णय येऊन धडकला. या निर्णयानुसार शेतकऱ्यांना साहित्य देता येणार नाही, तसेच त्यांचे खाते नंबरही घेतले नसल्याने काय करायचे असा प्रश्न उपस्थित झाला. त्यावर झटपट पुनर्नियोजन करून दुसऱ्या योजनांकडे निधी वळवून त्यास सर्वसाधारण सभेची मंजुरीही घेण्यात आली.

Check Also

अशोक खरात – प्रभाग क्र. ११ ‘क’ गट राष्ट्रीय समाज पक्षाचे अधिकृत उमेदवार

Click on Below Video Related

Leave a Reply

Your email address will not be published. Required fields are marked *