facebook
Sunday , February 26 2017
Breaking News
Home / Featured / कोण म्हणतं, राज्याला कृषी धोरण नाही ?

कोण म्हणतं, राज्याला कृषी धोरण नाही ?

सरकारच्या उदासीन कृषी धोरणाचे निवृत्त कृषी सचिव नानासाहेब पाटील यांनी जाहीर वाभाडे काढल्यानंतर रविवारी विधानसभेचे अध्यक्ष हरिभाऊ बागडे यांनी सरकारची पाठराखण केली. सरकारकडे ठोस कृषी धोरण आहे. या धोरणाची अंमलबजावणी प्रशासकीय अधिकाऱ्यांनी करायची असते, असे सांगत बागडे यांनी पाटील यांच्या वक्तव्याचा समाचार घेतला.

पंजाब-हरियाणा राज्याची लक्षणीय गहू उत्पादता असूनही केंद्र सरकारने गहू आयातीचा निर्णय घेतला आहे. कोरडवाहू भागात देशोधडीला लागलेल्या शेतकऱ्यांसाठी कोणत्याही प्रोत्साहन योजना नाहीत. निर्यातक्षम फळ उत्पादकता घटली आहे. पिकाला आधारभूत किंमत नसलेल्या देशात शेतीला भवितव्य नाही, असे निवृत्त कृषी सचिव नानासाहेब पाटील म्हणाले. हे परखड भाषण सत्ताधारी नेत्यांच्या जिव्हारी लागले आहे. अयोध्यानगरी मैदानावर भरलेल्या ‘महा-अॅग्रो’ कृषी प्रदर्शनाचे शनिवारी उदघाटन केल्यानंतर पाटील यांनी केंद्र आणि राज्य सरकारवर टीका केली. मात्र, कोणतेही सरकार कृषी धोरणाबाबत आग्रही नव्हते, असेही पाटील यांनी नमूद केले. मागील सरकारच्या काळात पक्षीय भूमिका बाजुला ठेवून नेत्यांचे एकत्रित पॅनेल कृषी धोरणासाठी नेमले होते. यात गुजरातचे तत्कालीन मुख्यमंत्री नरेंद्र मोदी यांचाही सहभाग होता. मात्र, या सरकारने पॅनेलचे काम मागे टाकून केवळ शहरी लोकांना खूष ठेवण्यासाठी स्वस्त धान्य ठेवण्याचा निर्णय घेतला. हा निर्णय शेतकऱ्यांसाठी हिताचा नाही, अशी टीका पाटील यांनी केली होती. या वक्तव्याचा विधानसभेचे अध्यक्ष हरिभाऊ बागडे यांनी समाचार घेतला.

‘पशूपालन आणि दुग्ध व्यवसाय’ या विषयावरील परिसंवादाला बागडे यांची प्रमुख उपस्थिती होती. पाटील यांच्या भाषणाचा दाखला देत त्यांनी सरकार शेती धोरणासाठी सक्षम असल्याचे सांगितले. या सरकारकडे शेतीचे ठोस धोरण आहे. धोरणाची प्रशासकीय अधिकाऱ्यांनी अंमलबजावणी करायची असते. आपल्या कार्यकाळात त्यांनी प्रयत्न करायचा असता’ असे बागडे म्हणाले. सत्ताधारी सरकारचे कृषीविषय धोरण नेहमीच निराशाजनक राहिले आहे. एका वर्षात पाच लाख शेततळी देण्याची घोषणा मुख्यमंत्री देवेंद्र फडणवीस यांनी एक वर्षापूर्वी जालना येथे केली होती. प्रत्यक्षात पाच हजार शेततळीसुद्धा पूर्ण झाली नाही. या परिस्थितीत सरकार विरूद्ध निवृत्त अधिकारी अशी टोलेबाजी शेतकऱ्यांसाठी उत्सुकतेचा विषय ठरली.

शेतकरी बाजारचे उद्‍घाटन

‘आपल्या देशाचा प्रमुख व्यवसाय शेती असून विविध कारणांनी शेतकरी अल्पभूधारक झाले आहेत. शेती फायद्याची कशी करावी, असा प्रश्न आहे. कमी शेतीत अधिक उत्पादन घेण्यासाठी अत्याधुनिक तंत्रज्ञानाचा अवलंब करावा. पशूपालन, दूग्धव्यवसाय, मत्स्यपालन या व्यवसायातून शेती स्थिर करता येईल. शेतकऱ्यांनी आधुनिक शेतीकडे वळावे’ असे प्रतिपादन विधानसभा अध्यक्ष हरिभाऊ बागडे यांनी केले. ‘महा-ऍग्रो’ कृषी प्रदर्शनात रविवारी बागडे यांच्या हस्ते ‘शेतकरी बाजार’चे उदघाटन करण्यात आले. यावेळी विभागीय आयुक्त डॉ. उमाकांत दांगट, महाराष्ट्र चेंबर ऑफ कॉमर्स, इंडस्ट्रीज अँड अॅग्रीकल्चरचे माजी अध्यक्ष राम भोगले, डॉ. नितीन मार्कंडेय, डॉ. यशवंत वाघमारे, समन्वयक अॅड. वसंतराव देशमुख आदी उपस्थित होते. ‘दूग्ध व्यवसायाने शेतकरी स्थिर झाला. ज्या ठिकाणी शेतीला दुग्धव्यवसायाची जोड होती तिथे शेतकऱ्यांनी आत्महत्या केली नाही असे बागडे म्हणाले.

Check Also

अशोक खरात – प्रभाग क्र. ११ ‘क’ गट राष्ट्रीय समाज पक्षाचे अधिकृत उमेदवार

Click on Below Video Related

Leave a Reply

Your email address will not be published. Required fields are marked *