facebook
Tuesday , February 28 2017
Breaking News
Home / औरंगाबाद / तर मग, होय आम्ही देशविरोधीच

तर मग, होय आम्ही देशविरोधीच

‘नोटबंदीविरुद्ध आम्ही ५० दिवसानंतर आंदोलन सुरू करत आहोत. नोटबंदीला विरोध करणाऱ्यांना देशविरोधी म्हटले जात आहे. असे असेल तर, होय आम्ही आहोत देशविरोधी आहोत. पण, आरएसएसने आम्हाला चारित्र्य शिकवू नये,’ अशा शब्दात भारिप-बहुजन महासंघाचे नेते अॅड. प्रकाश आंबेडकर यांनी राष्ट्रीय स्वयंसेवक संघाला फटकारले.

कार्यकर्ता मेळव्यानिमित्त अॅड. आंबेडकर हे बुधवारी शहरात आले होते. यावेळी पत्रकारांशी बोलताना ते म्हणाले, देशाच्या चलनातील ४० टक्के पैसा ‘नॉन टॅक्सेबल’ असून त्यावर कर बसवण्यासाठी हा निर्णय घेण्यात आला आहे. पण, त्याला देशभक्ती आणि बेहिशोबी पैशाचे नाव देण्यात आले. देशाचे पंतप्रधान ‘प्लॉस्टिक मनी’ वापरण्याचा सल्ला देत आहेत पेटीएम ही कंपनी चीनची असून चीनने पाकिस्तानी अतिरेक्यांना पाठिशी घातले होते. पेटीएमचा वापर करून आपण चीनला मदत करत आहोत. चीनच्या माध्यमातून सध्याचे सरकार पाकिस्तानाला मदत करत आहे, असा आरोप त्यांनी केला. ‘नोटबंदी विषयावर देशाचे पंतप्रधान सर्वोच्च सभागृहात बोलत नाहीत. काळा पैसा, देशभक्ती असे भावनिक शब्द वापरले जात आहेत. यामुळे मध्यमवर्गीयांमध्ये चिंतेचे वातावरण आहे, असे ते म्हणाले.
बेहिशोबी पैसा शोधण्यासाठी नेमलेली व्होरा समिती व जे. शहा एसआयटी समितीने दिलेल्या अहवालात एकही आदिवासी आणि दलित नाही. त्यामुळे या अहवालावर शासन कार्यवाही करत नाही, असा आरोप त्यांनी केला.

‘देशाच्या सभागृहात मला बोलू दिले जात नाही, असे पंतप्रधान खोटे सांगत आहेत. गुजरातचे मुख्यमंत्री असतानाही त्यांनी सभागृहात उत्तर देण्याचे टाळले होते,’ अशी माहिती त्यांनी दिली. बहुजन समाज पक्षाच्या बँक अकाउंटवर मोठी रक्कम मिळाल्याबद्दलच्या प्रश्नावर अॅड. आंबेडकर यांनी बीएसपी व बीजेपी एकाच नाण्याच्या दोन बाजू असल्याची टीका केली. निवडणुकीपूर्वीच उत्तरप्रदेश हातचा गेल्याचे लक्षात आल्याने भाजपतर्फे बसपला प्रकाशझोतात आणले जात आहे, असा दावा त्यांनी केला. मराठा, मुस्लिम व इतर जातींकडून आरक्षणाची मागणी होत असल्याबद्दलच्या प्रश्नावर, आरक्षण हा एकमेव मार्ग त्यांना दिसत आहे, त्यामुळे सर्वांना आरक्षण देऊन टाका, असे मत मांडले. पण, संपूर्ण समाजाचा विचार केल्यास आरक्षण हाच विकासाचा एकच मार्ग आहे का, याचा विचार करून पावले उचलण्याची गरज असल्याचे ते म्हणाले.

राहुल गांधींनी ‘ब्लफ मास्टर’ होऊ नये
काँग्रेस उपाध्यक्ष राहुल गांधी यांनी पंतप्रधानांवर आरोप केले आहेत. सहारा प्रकरणाचा खटला कोर्टात सुरू असून कोर्टासमोर पुरावे नाहीत. शीला दीक्षित यांनी कोर्टात शपथपत्र देऊन या प्रकरणाची चौकशी करावी, अशी विनंती केल्यानंतर कोर्टाची कारवाई सुरू होईल. त्यासाठी राहुल गांधींनी शीला दीक्षित यांना तसे सांगावे. फक्त आरोप करून राहुल गांधी यांनी ‘ब्लफ मास्टर’ होऊ नये, अशी बोचरी टीका अॅड. प्रकाश आंबेडकर यांनी केली.

नोटंबदीविरुद्ध आंदोलनांची हाक
सिडकोतील संत संत तुकाराम सभागृहात भारिप-बहुजन महासंघाच्या मेळाव्यात नोटंबदीविरुद्ध ‘रोटी द्या किंवा नोटा द्या’ हे आंदोलन घोषित करण्यात आले. या मेळाव्याला अॅड. प्रकाश आंबेडकर यांची प्रमुख उपस्थिती होती. पंतप्रधानांनी जाहीर केल्याप्रमाणे ५० दिवसांचा वेळ संपला आहे. या काळात स्थिती बिघडली असून बेरोजगारी वाढण्याची शक्यता असल्याची टीका त्यांनी केली. राज्यात सर्वत्र महाराष्ट्र लोकशाही आघाडी व भारिप बहुजन महासंघाचे उमेदवार देणार असल्याचे त्यांनी सांगितले.

Check Also

गोवंश हत्याबंदीला सुप्रीम कोर्टात आव्हान

गोवंश हत्याबंदी दुरुस्ती कायदा रद्द करण्याबाबतची जनहित याचिका मुंबई हायकोर्टाच्या औरंगाबाद खंडपीठाने फेटाळली होती. या …

Leave a Reply

Your email address will not be published. Required fields are marked *