facebook
Tuesday , March 28 2017
Breaking News
Home / Featured / महागड्या ‘टॅक्सी’तून लाखोंची ‘टॅक्स’चोरी!

महागड्या ‘टॅक्सी’तून लाखोंची ‘टॅक्स’चोरी!

आवाज न्यूज नेटवर्क –

औरंगाबाद – कागदोपत्री टॅक्सी असल्याचे दाखवून महागड्या गाड्यांचा लाखो रुपयांचा कर बुडविल्याची माहिती समोर आली आहे. टॅक्सीची परवानगी घेऊन गाड्यांचा वापर मात्र स्वतःसाठी केला जात आहे. या १४ गाड्यांच्या मालकांनी चलाखी करून कर बुडविल्याची माहिती परिवहन विभागातील सूत्रांनी दिली. दरम्यान, उत्पादन शुल्क विभागाकडून पाच टक्के परतावाही गाडी मालकांना देण्यात आला आहे, असेही या सूत्रांनी सांगितले.
औरंगाबादमध्ये एमएच २० डीएफ सिरीजमधील १३ गाड्यांची आणि एमएच २० ईए सिरिजमधील एका गाडीची माहिती मागविण्यात आली आहे. या दोन्ही सिरीज वाणिज्यिक वापरासाठी असलेल्या वाहनांची क्रमांकांसाठी आहेत. शहरातील काही बड्या मंडळींनी पुणे आणि मुंबईहून आणलेल्या महागड्या गाड्यांची पासिंग औरंगाबादेत केली. पासिंग करताना या गाड्या ट्रान्सपोर्ट गटात नोंदविल्या. खासगी वापरासाठी एखाद्या व्यक्तीने १० लाख रुपयांच्या आतील किमतीची गाडी घेतल्यास १२ टक्के दराने वन टाइम टॅक्स भरावा लागतो. १० लाख ते २० लाखांदरम्यानच्या गाड्यांसाठी गाडीला १३ टक्के आणि २० लाखांवर असलेल्या गाड्यांसाठी २० टक्के कर भरावा लागतो. आयात केलेल्या गाड्यांसाठी दुप्पट कर भरावा लागतो. यामुळे महागड्या गाड्यांवरील कराची रक्कम लाखो रुपये असते.
ट्रान्सपोर्ट किंवा वाणिज्यिक वापरासाठी एखादी गाडीची नोंदणी केल्यास प्रती सिट अडीच हजार रुपये कर भरावा लागतो. यामुळे एका फोर सिटर गाडीला वर्षाला दहा हजार रुपये भरावे लागतात. कर वाचविण्यासाठी या बड्या मंडळींनी आपल्या गाड्यांची नोंदणी ट्रान्सपोर्ट गटात करून लाखो रुपये कर बुडविला. याशिवाय उत्पादन शुल्क कार्यालयानेही या गाडी मालकांना एकूण किंमतीचा अंदाजे पाच टक्के परतावा दिला आहे. कर बुडविण्याबरोबर उत्पादन शुल्क विभागाकडून परतावाही पदरात पाडून घेतल्याची माहिती समोर आल्यानंतर प्राप्तिकर विभागाच्या सेंट्रल व्हिजिलन्स कमिटीने यासंदर्भात अहवाल मागवून घेतला आहे. या प्रकरणाची सखोल चौकशी होण्याची शक्यता आहे.

कारवाई पुण्यातून

पुण्याच्या सेंट्रल व्हिजिलन्स विभागाकडून औरंगाबाद शहरातील १४ महागड्या गाड्यांची माहिती मागविण्यात आली आहे. या गाड्यांचे शो रूम पुण्यात आहेत. यामुळे ही कारवाई पुणे विभागाकडून करण्यात आली आहे, अशी माहिती प्राप्तिकर विभागाच्या सूत्रांनी दिली.

एखादी गाडी नोंदणीसाठी आल्यानंतर त्यांनी ट्रान्सपोर्ट गटात रजिस्ट्रेशन करावे की खासगीत वापराच्या गटात करावे, हा ग्राहकाचा निर्णय असतो. त्याबाबत आम्ही बोलू शकत नाही, मात्र प्रवासी वाहतुकीसाठी नोंदणीकृत गाड्यांचा वापर खासगी नंबर प्लेट लावून केला जात असेल, तर त्यांच्यावर कारवाई केली जाईल.
– सर्जेराव शेळके, प्रादेशिक परिवहन अधिकारी, औरंगाबाद

प्राप्तिकर विभागाने मागितलेल्या यादीत टॅक्सी पासिंगच्या गाड्या असल्याची माहिती आरटीओ विभागाकडून देण्यात आली आहे. या प्रकरणाची माहिती घेऊन, शहनिशा करून त्यावर कारवाई करण्यात येईल.
– प्रवीण गेडाम, परिवहन अायुक्त.

Check Also

अशोक खरात – प्रभाग क्र. ११ ‘क’ गट राष्ट्रीय समाज पक्षाचे अधिकृत उमेदवार

Click on Below Video Related

Leave a Reply

Your email address will not be published. Required fields are marked *