facebook
Wednesday , May 24 2017
Breaking News
Home / Featured / शिक्षण की नोकरी?

शिक्षण की नोकरी?

आवाज न्यूज नेटवर्क –

ठाणे – लॉ कॉलेजांनी सकाळी ८ ते सायंकाळी ७ यावेळेतच विद्यार्थ्यांना शिकवावे, असे स्पष्ट आदेश बार कौन्सिलने दिल्याने नोकरी करून वकिली शिक्षण घेणाऱ्या विद्यार्थ्यांची फरफट होणार आहे. ठाणे जिल्ह्यात असणाऱ्या विद्या प्रसारक मंडळाच्या कॉलेजात नोकरी करून शिकणारे अनेक विद्यार्थी असून त्यांच्यापुढे मोठा संभ्रम निर्माण झाला आहे.

विद्या प्रसारक मंडळाचे ठाणे जिल्ह्यात एकमेव रात्र लॉ कॉलेज आहे. या कॉलेजात वासिंद, बदलापूर, कर्जत, अंबरनाथ, वाडा, मुरबाड आदी भागातील विद्यार्थी कायद्याचे शिक्षण घेण्यासाठी येतात. अनेक विद्यार्थी नोकरी करत वकिली शिक्षण घेत आहेत. मात्र बार कौन्सिलच्या निर्णयामुळे या विद्यार्थ्यांना शिक्षण घेणे कठीण होणार आहे. या निर्णयापूर्वी दुपारी ३.३० ते रात्री ९ पर्यंत हे वर्ग चालत होते. मात्र यह निर्णयानंतर कॉलेजने वेळेत बदल करून दुपारी दीड ते सात अशी वेळ केल्याने नोकरी करून कॉलेज गाठणाऱ्या विद्यार्थ्यांना सुरुवातीच्या काही तासांना मुकावे लागणार आहे.

लॉ कॉलेजच्या दुसऱ्या आणि तिसऱ्या वर्षाला काही दिवस सुट्टी आहे. त्यामुळे सध्या तरी या विद्यार्थ्यांना त्रास नाही. मात्र पहिल्या वर्षाच्या विद्यार्थ्यांना ही वेळ जुळवताना तारेवरची कसरत करावी लागत आहे. या निर्णयामुळे कॉलेज प्रशासनाने वेळेत बदल केले आहेत. मात्र वेळेचे गणित न जुळल्याने अनेक विद्यार्थी वकिली शिक्षण कसे घेतील, असा प्रश्नही या निमित्ताने उपस्थित झाला आहे. अचानक आलेल्या निर्णयामुळे विद्यार्थ्यांना अर्धवट शिक्षण सोडावे लागणार आहेत.

पूर्वीचा वेळ योग्य होता. आता नवी वेळ साधताना आम्हाला तारेवरची कसरत करावी लागणार आहे. नोकरी करून कॉलेजला हजेरी लावणे कठीण आहे. या वेळेमुळे सुरुवातीचे काही तास रोज बुडण्याची भीती आहे. त्यामुळे बार कौन्सिलने निर्णयाचा पुनर्विचार करायला हवा.

राजेश कोळी, द्वितीय वर्ष

Check Also

1)देहूरोडमध्ये बॉम्ब सदृष्य वस्तूचा स्फोट; तीन जखमी 2) स्वाईन फ्लूमुळे पुणे व्हेंटीलेटरवर

Related

Leave a Reply

Your email address will not be published. Required fields are marked *