facebook
Tuesday , March 28 2017
Breaking News
Home / कोल्हापूर / बेवारस वाहने होणार जप्त

बेवारस वाहने होणार जप्त

शहरातील बेवारस वाहनांचा सर्व्हे पूर्ण झाला असून, ४०५ बेवारस वाहने आढळली आहेत. महापालिकेने संबंधित वाहनांच्या मालकांचा शोध घेण्याची प्रक्रिया सुरू केली आहे. प्रतिसाद न मिळाल्यास वाहने जप्त करून हटविणार आहेत. शहराचा वाहतूक आराखडा बनवण्याचे काम अंतिम टप्प्यात असून, गेल्या सहा महिन्यांत सीसीटीव्ही कॅमेऱ्यांच्या माध्यमातून १०४२ बेशिस्त वाहनधारकांवर कारवाई केल्याची माहिती अप्पर पोलिस अधीक्षक सुहेल शर्मा यांनी मंगळवारी (ता. ३) पत्रकार परिषदेत दिली.

शहरातील वाहतूक कोंडी फोडून नियोजन करण्यासाठी पालकमंत्री चंद्रकांत पाटील यांनी २० नोव्हेंबरला पोलिस प्रशासनासह महापालिका आणि काही सामाजिक संस्थांची संयुक्त बैठक घेतली होती. या बैठकीत वाहतूक आराखडा तयार करण्यासह शहरातील रस्त्यांकडेला असलेल्या बेवारस वाहनांबाबत सविस्तर चर्चा झाली होती. ही वाहने हटवण्यासाठी तातडीने कारवाई करण्याच्या सूचना पालकमंत्र्यांनी दिल्या होत्या. यानुसार महापालिका, प्रादेशिक परिवहन विभाग आणि शहर वाहतूक शाखेने बेवारस वाहनांचा सर्व्हे पूर्ण केला असून, शहरात ४०५ बेवारस वाहने आढळली आहेत. मोटार वाहन कायदा ५३ अ प्रमाणे ही वाहने हटवण्याचे जाहीर आवाहन करण्यात आले आहे. संबंधितांनी तातडीने वाहने न हटवल्यास वाहने जप्त करण्यात येणार आहेत, अशी माहिती अप्पर पोलिस अधीक्षक सुहेल शर्मा यांनी दिली.

वाहतूत आराखडा अंतिम टप्प्यात असून, ट्रॅफिक सिग्नलमधील वेळेचा समन्वय साधण्यासाठी महापालिकेने २३ लाख रुपयांचा प्रस्ताव तयार केला आहे. गत‌िरोधक, दुभाजक, रस्त्यांवर पांढरे पट्टे मारणे अशी कामे शहरात २५ ठिकाणी होणार आहेत. यातील चार कामे पूर्ण झाली आहेत. या कामांसाठी ७० लाखांच्या निधीची तरतूद महापालिकेकडून करण्यात येत आहे. शिवाजी विद्यापीठातील टेक्नॉलॉजी विभागाने शहरातील कोंडी होणाऱ्या २४ ठिकाणांचा सर्व्हे केला आहे. याशिवाय रस्त्यांवरील भटक्या जनावरांना पकडून पांजरपोळमध्ये सोडण्याचेही काम सुरू आहे. महापालिका प्रशासनाने ६० गायींना पकडले, तर शहरातील जनावरांच्या मालकांनाही नोटिसा दिल्या आहेत, अशी माहिती शर्मा यांनी दिली. पोलिस मुख्यालयात सर्वाधिक उंचीचा राष्ट्रध्वज बनवणे, पोलिस उद्यानाचे नुतणीकरण आणि ट्रफिकसाठी मनुष्यबळ वाढवण्याचे काम सुरू असल्याची माहिती पोलिस अधीक्षक प्रदीप देशपांडे यांनी दिली. पत्रकार परिषदेसाठी शहर पोलिस उपाधीक्षक भारतकुमार राणे, वाहतूक नियंत्रण शाखेचे पोलिस निरीक्षक अशोक धुमाळ, स्थानिक गुन्हे अन्वेषण शाखेचे पोलिस निरीक्षक दिनकर मोहिते, आदी उपस्थित होते.

१०४२ वाहनधारकांवर कारवाई

सेफसिटी अंतर्गत शहरात लावलेल्या सीसीटीव्ही कॅमेऱ्यांमुळे पोलिसांना वाहतुकीवर नजर ठेवण्यास मोठी मदत होत आहे. गेल्या ६ महिन्यांत पोलिसांनी १०४२ बेशिस्त वाहनधारकांना नोटिसा पाठवून कारवाई केली आहे. सिग्नल तोडणे, वन वेतून वाहन चालवणे, बेदरकारपणे वाहन चालवणे, ट्रीपल सीट, विना नंबरप्लेट वाहन चालवणाऱ्या वाहनधारकांवर कारवाई करण्यात आली. यातून पोलिसांनी ९८ हजार ४०० रुपयांचा दंड वसूल केला आहे. काही गंभीर गुन्ह्यांची उकल करण्यासही सीसीटीव्ही कॅमेऱ्यांची मदत झाली आहे.

खासगी बसेसना सासने ग्राऊंडची जागा

दाभोळकर कॉर्नर परिसरात उभ्या राहणाऱ्या खासगी बसेसमुळे वाहतुकीची मोठी कोंडी होते. अनेकदा या वाहनांना कावळा नाका, वटेश्वर मंदिर परिसरात जागा देऊनही पुन्हा ही वाहने दाभोळकर कॉर्नरलाच उभी केली जातात. यावर तोडगा काढण्यासाठी पोलिसांनी सासने ग्राऊंडमधील २० हजार स्क्वेअर फूट जागेची मागणी केली होती. याबाबत महापालिकेसह पालकमंत्र्यांनीही हिरवा कंदील दिला आहे, त्यामुळे लवकरच खासगी बसेसना सासने ग्राऊंडची जागा मिळणार आहे.

Check Also

वाहतूकदारांचा शुल्कवाढीला विरोध

केंद्रीय मोटार वाहन नियमांतील विविध शुल्कात पाचपट वाढ केल्याच्या निषेधार्थ बुधवारी कोल्हापूर डिस्ट्रीक्ट लॉरी ऑपरेटर्स …

Leave a Reply

Your email address will not be published. Required fields are marked *