facebook
Sunday , March 26 2017
Breaking News
Home / Featured / ‘बिगबाजार’मध्ये जुने पदार्थ

‘बिगबाजार’मध्ये जुने पदार्थ

आवाज न्यूज नेटवर्क –

नागपूर – मॉल आणि सुपर मार्केट संस्कृतीत किरकोळ दुकानदार संकटात आले आहेत. हव्या त्या पसंतीने व सोप्याप्रकारे खरेदी होत असल्याने ग्राहकदेखील अशा सुपर मार्केट्सना पहिली पसंती देतात. सुपर मार्केटचा माल चांगलाच, असा आंधळा विश्वास ग्राहकांचा असतो. पण, या सुपर मार्केटमध्येदेखील फसवणूक होते. एवढेच नाही तर ती उघडकीस आणली तर गैरवर्तवणूकदेखील होऊ शकते, असा अनुभव एका ग्राहकाला अलीकडे बिग बाजारमध्ये आला.

सध्या सर्वत्र सुपर मार्केटचा माहौल आहे. शहरातील ५० टक्क्यांहून अधिक ग्राहक या मॉलकडे आकर्षित होतात. अशा मॉल आणि सुपर मार्केटमध्ये बिग बाजार हे अव्वल मानले जाते. पण, याच बिग बाजारमध्ये जुना माल ठेवण्यात आल्याचे प्रकरण बाहेर आले आहे. तशी तक्रार एका ग्राहकाने केली आहे.

राकेश मिरासे यांनी मागील महिन्यात २७ तारखेला एम्प्रेस मॉलमधील बिग बाजारातून ‘टेस्टी ट्रीट’ कंपनीचा मॅन्गो जाम खरेदी केला. हा जाम तेथे आकर्षक पद्धतीने ठेवण्यात आला होता. वरून बिग बाजारातील वस्तू आहे, यामुळे मिरासे यांनी बिनधास्तपणे तो माल खरेदी केला. सोबत अन्य वस्तूदेखील होत्या. या सर्वांचे संयुक्त बिल तयार करण्यात आले. पण, हा जाम खरेदी केल्यानंतर त्याची ‘एक्स्पायरी डेट’ निघून गेल्याचे त्यांच्या ध्यानात आले. यामुळे त्यांनी तेथील ग्राहक डेस्ककडे तक्रार केली. पण, तेथे त्यांना भीषण अनुभवाचा सामना करावा लागला. या ग्राहक डेस्कने सुरुवातीला तक्रार घेण्यास टाळाटाळ केली. पण, राकेश मिरासे यांनी तक्रार करण्याचा पाठपुरावा केल्यानंतर त्यांनी विक्री व्यवस्थापकांना पाचारण केले. विक्री व्यवस्थापकांनीदेखील तक्रार दाखल करून न घेता ती वस्तू (टेस्टी ट्रीट मॅन्गो जाम)

हातातून ‌हिसकावून घेण्याचा प्रयत्न केल्याचे मिरासे यांनी सांगितले. यासोबतच या वस्तूवर छापण्यात आलेली किंमत आणि बिग बाजारकडून आकारण्यात येणारी किंमत यातदेखील फरक होता. अशाप्रकारे बिग बाजारने चुकीची किंमत, तारीख उलटून गेलेला माल आणि गैरवर्तवणूक अशा तीन प्रकारे ग्राहकाला त्रास दिल्याची तक्रार राकेश यांनी बिग बाजारच्या ग्राहक डेस्ककडे

केली. ‘या तक्रारीची दखल घेतली जाईल’, असे उत्तर या डेस्ककडून राकेश यांना मेलवर आले. प्रत्यक्षात अद्यापही योग्य कारवाई करण्यात आली नसल्याचे राकेश यांचे म्हणणे आहे.

एफडीआयकडेही तक्रार

या प्रकारानंतर राकेश मिरासे यांनी अन्न व औषधे प्रशासनाकडेदेखील (एफडीआय) तक्रार केली. त्यावर तेथील सहाय्यक आयुक्तांनी अन्नसुरक्षा अधिकाऱ्यांना या प्रकरणाचा तपास करण्याची सूचना दिली. पण, अद्याप अन्न व औषधे प्रशासनाकडूनदेखील प्रतिसाद मिळालेला नसल्याचे मिरासे यांनी सांगितले.

चौकशी केली जाईल!

याबाबत बिग बाजारच्या प्रतिनिधींशी संपर्क साधला असता त्यांनी ‘या प्रकरणाची तक्रार मिळाली आहे. याबाबत चौकशी केली जाईल’, असे स्पष्ट केले. पण, ‘अद्याप पूर्ण माहिती नाही. चौकशी करून कारवाई करू’, असे बिग बाजार चालविणाऱ्या फ्युचर समुहाच्‍या कॉर्पोरेट कम्युनिकेशनचे प्रमुख राजेश राणा यांनी सांगितले.

ऑनलाइन तक्रारीची संधी

नागपूर : कुठलीही वस्तू व सेवा खरेदी करताना पैसा खर्च होत असल्याने आपण सजग असतोच. त‌रीही अनेकदा फसवणूक होते. अशावेळी तक्रार कुठे करावी, हे ग्राहकाला माहिती नसते. पण, तंत्रज्ञानाच्या या काळात आता ही तक्रार ऑनलाइनदेखील करता येईल. त्यासाठी कोअर सेंटर (कन्झ्युमर ऑनलाइन रिसोर्स अॅण्ड एम्पॉवर्मेंट सेंटर) केंद्र सरकारकडून चालविण्यात येते. याविषयी अधिक माहिती आपल्याला www.core.nic.in या वेबसाइटवर मिळू शकते. या वेबसाइटवर आपल्या जागो ग्राहक जागो अभियान, नॅशनल रिसोर्स सेंटर, तक्रारी दाखल करण्यासाठी उपलब्ध असलेला टोल फ्री नंबर, कन्झ्युमर फ्रेंडली ब्रँड, कन्झ्युमर नॉनफ्रेंडली ब्रँड याविषयी आपल्याला माहिती मिळू शकते. या वेबसाइटवर आपण ऑनलाइन तक्रार दाखल करू शकता.

याआधीही होता अनुभव

मोठे मॉल्स आणि बिग बाजारात अशाप्रकारे जुनी उत्‍पादने असल्याचे याआधीही दिसून आले आहे. एका मोठ्या सुपर मार्केटमध्ये याआधी पाकिटातील बुंदीच्या लाडवांना हिरवी बुरशी चढली असल्‍याचे नजरेस पडले होते. तर ज्या कंपनीच्या जामबाबत हे घडले त्याच कंपनीच्या लोणच्याचादेखील त्रास एका ग्राहकाला झाल्याचे दिसून आले आहे. या कंपनीचे लिंबाचे लोणचे एका ग्राहकाने खाल्ले आणि त्या व्यक्तीला ‘थ्रोट इन्फेक्शन’ झाल्याचे निदान डॉक्टरांनी केले. यामुळे असे अनुभव आल्यास ग्राहकांनी घाबरून न जाता तत्काळ संबंधित यंत्रणेकडे तक्रार करण्याचे आवाहन करण्यात आले आहे.

Check Also

अशोक खरात – प्रभाग क्र. ११ ‘क’ गट राष्ट्रीय समाज पक्षाचे अधिकृत उमेदवार

Click on Below Video Related

Leave a Reply

Your email address will not be published. Required fields are marked *