facebook
Thursday , April 27 2017
Breaking News
Home / नाशिक / यशासाठी उद्यमशीलतेला द्यावी नावीन्याची जोड

यशासाठी उद्यमशीलतेला द्यावी नावीन्याची जोड

आपला देश व्हर्च्युल जगाच्या दिशेने मार्गक्रमण करीत आहे. त्यामुळे केवळ ज्ञानाच्या जोरावर यशस्वी होणे अवघड आहे. तंत्रज्ञानाचा वाढता वापर लक्षात घेता आपल्या उच्च ध्येयाच्या दिशेने जाण्यासाठी सकारात्मक दृष्टिकोनातून कठोर मेहनत करण्याची तयारी हवी. उद्यमशीलतेला नावीन्याची जोड देत शहराकडून खेड्याकडे गेल्यास नक्की यशस्वी व्हाल, असा मंत्र ब्ल्यू डार्ट एक्स्प्रेस लिमिटेड या कंपनीचे चेअरमन तुषार जानी यांनी येथील उद्योग क्षेत्रात करिअर करू इच्छिणाऱ्या युवक-युवतींना दिला.

शिखर प्रतिष्ठानचे अध्यक्ष व व्यापारी बँकेचे संचालक हेमंत गायकवाड व नगरसेविका संगीता गायकवाड यांच्या वतीने नाशिक-पुणे महामार्गावरील दुर्गा इंटरनॅशनल हॉटेल येथे मी उद्योजक होणारच या अभिनव कार्यक्रमाचे आयोजन करण्यात आले होते. या कार्यक्रमाप्रसंगी तुषार जानी बोलत होते. याप्रसंगी त्यांनी भावी काळात तंत्रज्ञान व नवविचारांचे महत्त्व पटवून देत उद्योग क्षेत्रात यशस्वी होण्यासाठी कराव्या लागलेल्या संघर्षाची माहिती दिली.

यावेळी अडचणींवर जिद्दीने मात करून मेहनत व सचोटीने आपल्या उद्योग-व्यवसायात यशस्वी झालेल्या भगरासिंग परदेशी, मनोज गायकवाड, अनंत ठाकरे, रवीचंद हांडोरे आदी व्यावसायिकांचा पहिला शिखर पुरस्कार देऊन गौरव करण्यात आला. नगरसेवक संभाजी मोरुस्कर, प्रकाश घुगे, बाजीराव भागवत, डॉ. सीमा ताजणे आदी उपस्थित होते. नेहा खरे यांनी सूत्रसंचालन केले.

अपयश पचवणे शिका

यावेळी महाबळेश्वर येथील उद्योगपती सनरायझर्स कँडल्स कंपनीचे चेअरमन भावेश भाटिया यांनीही आपल्या संघर्षाची माहिती दिली. उद्योग सुरू करताना आलेल्या अडचणींवर त्यांनी जिद्दीने केलेली मात ऐकून उपस्थित सर्वच काही काळ स्तंभित झाले. दृष्टिहीन असूनही स्वतःची कंपनी सुरू करून तब्बल २३०० दृष्टिबाधितांना रोजगार उपलब्ध करून भाटियांच्या जिद्दीला उपस्थितांनी उभे राहून सलाम केला. सध्याच्या पिढीला अपयश पचवविणे अवघड झालेले असल्याने त्यांच्यात लवकर निराशा येत आहे. यशस्वी होण्यासाठी कठोर मेहनतीला पर्याय नसून अपयश पचवायला शिका, असा सल्लाही त्यांनी यावेळी उपस्थितांना दिला.

Check Also

मार्केट फुलले; चेहरे उतरले

रविवारच्या साप्ताहिक सुटीनंतर सोमवारी येवला कृषी उत्पन्न बाजार समितीचे येवला मुख्य बाजार आवार लाल कांदा …

Leave a Reply

Your email address will not be published. Required fields are marked *