facebook
Wednesday , March 29 2017
Breaking News
Home / कोल्हापूर / शिरोळमधील दिग्गज भाजपात

शिरोळमधील दिग्गज भाजपात

राष्ट्रवादी काँग्रेसचे जिल्हा उपाध्यक्ष दलितमित्र डॉ. अशोकराव माने, काँग्रेसचे शिरोळ तालुकाध्यक्ष अनिल यादव, कोल्हापूर जिल्हा मध्यवर्ती बँकेचे माजी अध्यक्ष विठ्ठलराव नाईक-निंबाळकर, राष्ट्रवादी काँग्रेसचे माजी तालुकाध्यक्ष धनाजीराव जगदाळे यांनी आपापल्या पक्षाला रामराम ठोकला. सोमवारी या सर्वांनी मुख्यमंत्री देवेंद्र फडणवीस व पालकमंत्री चंद्रकांत पाटील यांच्या उपस्थितीत भाजपमध्ये प्रवेश केला.

मुंबई येथे मुख्यमंत्र्यांच्या दालनात हा पक्षप्रवेशाचा कार्यक्रम झाला. ‘भाजप हा विकासाची दृष्टी असणारा पक्ष आहे. पक्षात सर्वांना सन्मानाची पदे दिली जातील. विकासासाठी निधी कमी पडू देणार नाही,’ अशी ग्वाही यावेळी मुख्यमंत्री देवेंद्र फडणवीस यांनी दिली.

गेले काही महिने शिरोळ तालुक्यातील अनेक दिग्गज भाजपमध्ये प्रवेश करणार असल्याची चर्चा होती. नुकताच काँग्रेसचे तालुकाध्यक्ष अनिल यादव यांनी आपल्या पदाचा राजीनामा दिला होता. त्यामुळे त्यांच्यासह अन्य काहीजण भाजपमध्ये जाणार, या तर्काला बळकटी आली होती. त्यापूर्वी कुरुंदवाडचे रामचंद्र डांगे, विजय भोजे, अभिजीत जगदाळे यांनी भाजपमध्ये प्रवेश केला आहे.

सोमवारी मुंबई येथे मुख्यमंत्री देवेंद्र फडणवीस यांच्या दालनात झालेल्या छोटेखानी कार्यक्रमात डॉ. अशोकराव माने, अनिल यादव, धनाजीराव जगदाळे, विठ्ठलराव नाईक-निंबाळकर, शिरोळच्या सरपंच सुवर्णा कोळी, यड्रावच्या सरपंच उषा तासगावे, लाटवाडीचे सरपंच राम खोत, तमदलगेच्या सरपंच सुरेखा कांबळे, मौजे आगरच्या सरपंच लक्ष्मी लोंढे यांच्यासह १२० कार्यकर्त्यांनी भाजपमध्ये प्रवेश केला. प्रवेशानंतर मुख्यमंत्र्यांच्या हस्ते सर्वांचा सत्कार करण्यात आला. यावेळी आमदार सुरेश हाळवणकर, गुरुदत्त शुगर्सचे अध्यक्ष माधवराव घाटगे, रामचंद्र डांगे, विजय भोजे, विजय मगदूम, जयसिंगपूरच्या नगराध्यक्षा डॉ. नीता माने, नगरसेविका अॅड. सोनाली मगदूम, गोकुळ दूध संघाचे संचालक बाबा देसाई, सुरेश पाटील यांच्यासह तालु्नयातील विविध भागांतील कार्यकर्ते उपस्थित होते.

चौकट

कॉग्रेसवर तालुकाध्यक्ष शोधण्याची वेळ

दिग्गजांच्या भाजपप्रवेशामुळे शिरोळ तालुक्यात काँग्रेस व राष्ट्रवादीला खिंडार पडले आहे. माजी आमदार दिनकरराव यादव यांचे पुत्र अनिल यादव हे गेली तीस वर्षे काँग्रेसमध्ये काम करीत होते. त्यांच्याकडे काँग्रेस तालुकाध्यक्षपदाची धुरा होती. तालुक्यात पक्ष वाढीमध्ये त्यांचे मोठे योगदान आहे. विधानसभेची उमेदवारीही त्यांनी मागितली होती. मात्र पक्षाने त्यांना सातत्याने डावलले होते. यादव यांच्या भाजपप्रवेशामुळे आता काँग्रेसवर नवा तालुकाध्यक्ष शोधण्याची वेळ आली आहे.

जि.प. समीकरणे बदलणार

शिरोळ तालुका मागासवर्गिय सूत गिरणीचे अध्यक्ष अशोकराव माने हे राष्ट्रवादीचे जिल्हा उपाध्यक्ष होते. त्यांच्याबरोबरच जिल्हा बँकेचे माजी अध्यक्ष विठ्ठलराव नाईक निंबाळकर, धनाजीराव जगदाळे यांनीही भाजपमध्ये प्रवेश केल्याने राष्ट्रवादीला फटका बसला आहे. तर दिग्गजांच्या प्रवेशामुळे भाजपचे शिरोळ तालुक्यातील बळ वाढले आहे. साहजिकच आगामी जिल्हा परिषद व पंचायत समिती निवडणुकीतील समीकरणेही आता बदलणार आहेत.

Check Also

वाहतूकदारांचा शुल्कवाढीला विरोध

केंद्रीय मोटार वाहन नियमांतील विविध शुल्कात पाचपट वाढ केल्याच्या निषेधार्थ बुधवारी कोल्हापूर डिस्ट्रीक्ट लॉरी ऑपरेटर्स …

Leave a Reply

Your email address will not be published. Required fields are marked *